Bu günlər Moskvada yeniyetmə şahmatçılardan ibarət səkkiz komandanın iştirakı ilə beynəlxalq dərəcəli hakim Vladimir Dvorkoviçin xatirəsinə həsr olunmuş turnir keçirilir. Yarışın mükafatları uğrunda Rusiya (iki heyətlə təmsil olunur), Azərbaycan, Çin, Qazaxıstan, Ukrayna, Belarus və Ermənistan yığmaları mübarizə aparırlar. Turnirdə komandalar bir-birinə qarşı iki matç keçirirlər.
Misrəddin İsgəndərov, Amil Abbasov, Şücaət Orucov və Ülviyyə Fətəliyevadan ibarət Azərbaycan yığması ilk üç gündə Qazaxıstan komandasına qalib gəlmiş (birinci matçda 4:0, ikincidə 3,5:0,5), Rusiya şahmatçıları ilə bir matçda uduzmuş - 1:3, digərində heç-heçə oynamış - 2:2, Belarusdan üstün olmuşdur - 2:2, 3:1.
Altı turdan sonra həmvətənlərimiz 8 xalla turnir cədvəlində ikinci mövqedədirlər. Dünən növbəti iki turun matçları keçirilmişdir. On dörd turdan ibarət turnirə iyulun 6-da yekun vurulacaqdır.

Fransız Entoni Qotye
UEFA Çempionlar Liqası turnirinin ikinci təsnifat mərhələsinin birinci raundunda Xorvatiyanın "Dinamo" və Azərbaycanın "Neftçi" komandaları arasında keçiriləcək görüşün hakimi məlumdur. Zaqrebin "Maksimir" stadionunda oynanılacaq bu matçı Fransa Futbol Federasiyasının nümayəndəsi Entoni Qotye idarə edəcəkdir. Görüş iyulun 13-də Bakı vaxtı ilə saat 23-də başlanacaq.

Oqtay BAYRAMOV, "Xalq qəzeti"