Azərbaycan cüdoçuları növbəti medalların sevincini yaşamışlar. Bu dəfə tatami ustalarımız Braziliyanın San-Paulu şəhərində keçirilən Dünya kuboku turnirində fərqlənərək ölkəmizə dörd medal qazandırmışlar.
Həmvətənlərimiz arasında ən böyük müvəffəqiyyətə Azərbaycanda qadın cüdosunun lideri Kifayət Qasımova (57 kq) nail olmuşdur. O, gümüş mükafatçı kimi fəxri kürsünün ikinci pilləsində təbrikləri qəbul etmişdir. Kifayətin rəfiqəsi Ramilə Usubova da inamla çıxış edərək 63 kq çəki dərəcəsində bürünc medal qazanmışdır.
Kişilərin turnirində isə İlqar Muşkiyev (60 kq) və Elmar Qasımov (100 kq) yaxşı hazırlıq nümayiş etdirmişlər. Hər iki cüdoçumuz üçüncü mükafatçı olmuşdur. Bu uğurlar yığmamıza komanda hesabında bir çox ölkəni qabaqlayaraq doqquzuncu yeri tutmaq imkanı vermişdir.

Gümüş mükafatçı
Polşada başa çatmış gənclər arasında akademik qayıqlarda avarçəkmə üzrə Avropa birinciliyi Azərbaycan idmançısı Boris Yotov üçün gümüş medalla əlamətdar olmuşdur. O, 2000 metr məsafəyə yarışda ukraynalı qalibdən sonra ikinci nəticə göstərmişdir.

"Rabitə"nin rəqibləri məlumdur
Xəbər verdiyimiz kimi, bu ilin oktyabr ayında Qətərin paytaxtı Dohada qadın voleybol klubları arasında dünya çempionatı keçiriləcək və bu mötəbər yarışın iştirakçıları arasında Çempionlar Liqasında sonuncu turnirin finalçısı Azərbaycanın "Rabitə" komandası da olacaq.
Bu günlərdə atılmış püşk çempionatın ilkin mərhələsində rəqibləri iki qrupa bölmüşdür. "Rabitə" Braziliyanın "Unilever" və Tailandın "Çanq" komandaları ilə bir qrupda çıxış edəcək. Digər qrupda isə "Vakifbank" (Türkiyə), "Kenya Prayzons" (Keniya) və "Çaquas" (Puerto-Riko) klubları mübarizə aparacaqlar. Qruplarda ilk iki yeri tutan kollektivlər yarımfinala çıxacaqlar. Xatırladaq ki, ötən il klublararası dünya çempionatının qalibi Türkiyənin "Fənərbaxça" (İstanbul) komandası olmuşdur.

Finalda İspaniya qalib gəldi
Danimarkada keçirilmiş 21 yaşınadək gənclər arasında futbol üzrə Avropa çempionatının qızıl medalları İspaniya yığmasına təqdim olunmuşdur. Çempion finalda İsveçrə komandasını iki cavabsız qolla məğlubiyyətə uğratmışdır - 2:0.
Üçüncü yer uğrunda görüşdə isə Belarus futbolçuları çexiyalı rəqiblərinə qalib gəlmişlər - 1:0. Hər üç qalib komanda London Olimpiadası - 2012-yə vəsiqə qazanmışdır.

Oqtay BAYRAMOV, "Xalq qəzeti"