Serbiyanın Zrenyanin şəhərində keçirilən gənclər arasında güləş üzrə Avropa çempionatında uğurla çıxış edərək altı medal qazanan Azərbaycanın sərbəst güləşənlərindən sonra qadın idmançılarımız da qitə birinciliyinə inamla başlamışlar. Turnirin birinci günü onlardan ikisi fəxri kürsüyə dəvət olunmuşdur.
P. və M. Baqomedova bacıları fərqlənmişlər. Patimat yalnız final görüşündə uduzaraq 51 kq çəki dərəcəsində gümüş medal qazanmış, Marziget isə 44 kq çəki dərəcəsində üçüncü mükafatçı olmuşdur.
Dünən digər çəkilərdə də qaliblər müəyyənləşməli idi. Bu gün və sabah isə yunan-Roma üsulu ilə güləşənlər starta çıxacaqlar.

Ukraynalı Mojarovski və bolqar Angelov
Xəbər verdiyimiz kimi, iyunun 30-da UEFA Avropa Liqası turnirinin birinci təsnifat mərhələsinin 1-ci raundu çərçivəsində Azərbaycanın "Qarabağ" və AZAL komandalarının iştirakı ilə keçiriləcək görüşləri müvafiq surətdə islandiyalı və latviyalı hakimlər idarə edəcəklər.
Artıq cavab matçlarının da hakimləri məlumdur. İyulun 7-də Tofiq Bəhramov adına Respublika stadionunda oynanılacaq "Qarabağ" - "Banqa" (Litva) görüşündə rəqibləri meydana ukraynalı Yuri Mojarovski dəvət edəcək, elə həmin günə təyin edilmiş "Minsk" (Belarus) - AZAL qarşılaşmasında isə baş hakim funksiyasını Angel Angelov (Bolqarıstan) yerinə yetirəcəkdir.

İspaniya, yoxsa İsveçrə?
Danimarka stadionlarında 21 yaşlı futbolçulardan ibarət yığma komandalar arasında Avropa çempionatı finişə çatmaq üzrədir. Qızıl medalların sahibləri bu gün keçiriləcək İspaniya-İsveçrə finalında müəyyənləşəcək. Həlledici görüşü italiyalı hakim Paolo Talyavento idarə edəcəkdir.
Yarımfinalda ispanlar Belarus yığmasını məğlubiyyətə uğratmış (3:1), İsveçrə futbolçuları isə Çexiya komandasına qalib gəlmişlər (1:0).

Oqtay BAYRAMOV, "Xalq qəzeti"