Azərbaycanlı çəkic tullayan Dmitri Marşin Minskdə keçirilən beynəlxalq turnirdə 74,4 metr nəticə ilə üçüncü yeri tutmuşdur. Bu barədə məlumat verən azerisport həmçinin bildirir ki, həmin nəticə idmançımıza Azərbaycan üçün ilk olimpiya lisenziyasının müəllifi olmaq imkanı vermişdir. Marşin "Ümid" klubunu təmsil edir.
Xatırladaq ki, növbəti, XXX Yay Olimpiya Oyunları gələn ilin iyul-avqust aylarında Londonda keçiriləcəkdir.

Rusiya və Gürcüstandan sonra üçüncü
Ölkəmizin sərbəst üsulla güləşənləri Serbiyada başa çatmış gənclər arasında Avropa çempionatında çıxışlarının yekunlarından razı qala bilərlər. Onlar turnirdə 6 medal qazanaraq komanda hesabında Rusiya və Gürcüstan yığmalarından sonra üçüncü yeri tutmuşlar.
Qitə birinciliyində təmsilçilərimiz arasında ən böyük müvəffəqiyyətə 96 kq çəki dərcəsində çıxış edən Aslanbəy Alborov sevinmişdir. O, fəxri kürsünün zirvəsində təbrikləri qəbul etmişdir. Hacı Əliyev (60 kq), Məhəmməd Müslümov (66 kq) və Aslan Dzebişov (120 kq) evə gümüş medalla qayıdırlar, Mircəlal Həsənzadə (50 kq) və Qalib Əliyev (55 kq) isə bürünc mükafatçı olmuşlar.

Latviyalı və islandiyalı hakimlər
İyunun 30-da UEFA Avropa Liqası turnirinin birinci təsnifat mərhələsinin 1-ci raundu çərçivəsində Azərbaycanın AZAL və "Qarabağ" klublarının iştirakı ilə keçiriləcək oyunların hakimləri məlumdur.
Ölkəmizdə oynanılacaq AZAL -"Minsk" (Belarus) görüşündə ədaləti Latviya Futbol Federasiyasının nümayəndəsi Andris Treimanis qoruyacaq. Həmin gün Litvada keçiriləcək "Banqa" - "Qarabağ" qarşılaşmasının hakimliyi isə islandiyalı Torvaldur Arnasona həvalə olunmuşdur.

Oqtay BAYRAMOV, "Xalq qəzeti"