Respublikanın əməkdar jurnalisti, AFFA-da Futbol muzeyinin direktoru Abas Əzimovun futbola və futzala böyük məhəbbətlə qələmə aldığı bu kitablar, demək olar, eyni vaxtda işıq üzü görmüşdür. Hər iki kitab bu yaxınlarda ölkəmizdə geniş qeyd olunmuş Azərbaycan futbolunun 100 illiyinə həsr edilmişdir.
Rəngarəng, bir növ tarixi fotolarla müşayiət olunub ötən illərdə yaşıl meydançalarda baş verən hadisələri bir daha futbolsevərlərin xatirəsində canlandıran birinci kitabda müəllif bütün həyatları boyu futbola sədaqətlə xidmət etmiş, təəssüf ki, indi sıralarımızda olmayan insanlar - istər bu oyunun mahir ustaları, istərsə də məşqçi, hakim və həkimlər, eləcə də futbolda rəhbər işçilər kimi fəaliyyət göstərmiş mütəxəssislər haqqında söhbət açır, onların keçdikləri yolu xatırladır.
"Xatirələrdə yaşayanlar" kitabında dünya şöhrətli hakimlərimiz Tofiq Bəhramov, Eldar Əzimzadə, onların həmkarı Teymur Vəliyev, səkkiz il Azərbaycan Futbol Federasiyasının sədri olmuş, bir müddət də "Neftçi"də həkim kimi fəaliyyət göstərmiş Kamal Axundov, AFFA-da rəhbər vəzifələrdə çalışmış Toğrul Hacıyev, məşqçilər Şirəli Şirəliyev, Vaqif Abbasov, Valentin Xlıstov, Konstantin Abramenko, uzun illər ərzində texnikalı və yüksək səviyyəli oyunları ilə fərqlənmiş Mirmehdi Ağayev, Vladimir Karmayev, Vladimir Turkiya, Əli Əbilzadə, Kamil Eynullayev, Anatoli Banişevski, Ruslan Abdullayev, Adil Babayev, Sergey Kramarenko, Əli Rəhmanov, Vladimir Bruxti, Rəşid Özbəyov, habelə məşhur şərhçi, əməkdar jurnalist Valid Sənani haqqında səmimi sətirlər yer almışdır.
Əlbəttə ki, müəllif həyatlarının bir çox ilini futbola həsr edərək milyonların bu sevimli oyununun ölkəmizdə təşəkkül və inkişafında xidmətləri olmuş insanları xatırlamaqla nəcib iş görmüşdür. Kitabda haqqında söhbət gedən şəxslərin hər biri idman ictimaiyyətimiz arasında geniş nüfuz qazanmışdı.
A.Əzimov "Futbolumuzun futzal salnaməsi" kitabında isə böyük futbolun kiçik qardaşı olan futzalın Azərbaycanda yaranma tarixi, ənənələri, respublika çempionatları və kubok yarışları, komandalarımızın UEFA kuboku turnirlərində, dünya və Avropa çempionatlarının seçmə yarışlarında çıxışları haqqında ətraflı məlumat vermişdir. AFFA-nın vəsaiti hesabına nəşr olunmuş hər iki kitab Azərbaycan futbolunun bir əsrlik yubileyi ilində idman həvəskarlarına yaxşı töhfədir.

Oqtay BAYRAMOV, "Xalq qəzeti"