Azərbaycan şahmatçısı Teymur Rəcəbov Rumıniyanın Mediaş şəhərində keçirilən ənənəvi beynəlxalq turnirin birinci dövrəsini qələbəsiz başa vurmuşdur. Qrossmeysterimiz ilk üç turda bir məğlubiyyət və iki heç-heçədən sonra növbəti iki görüşdə Liviu-Diter Nisipyanu (Rumıniya) və Hikaru Nakamura (ABŞ) ilə "dinc" nəticəyə razılaşmışdır.
Rəcəbov turnirin birinci yarısında 2 xal toplayaraq onunla eyni nəticə göstərən Nisipyanu və ukraynalı Vasili İvançukla dörd-altıncı yerləri bölüşdürür. Lider isə 3,5 xala malik Maqnus Karlsendir (Norveç). İkinci-üçüncü mövqelərdə olan Sergey Karyakinlə (Rusiya) Nakamuranın müvafiq surətdə 3 və 2,5 xalı vardır
Dünən turnirdə istirahət günü idi. Altıncı turun oyunları bu gün keçiriləcəkdir. Rəcəbov ikinci dövrəyə İvançuka qarşı görüşlə başlayacaq. Xatırladaq ki, Teymur turnirin startında ukraynalı qrossmeysterə uduzmuşdu.

Oqtay BAYRAMOV, "Xalq qəzeti"