Bu gün Bakıda səkkiz ölkənin 17 yaşlı futbolçulardan ibarət yığma komandaları arasında beynəlxalq "Caspian Cup" turnirinə start veriləcəkdir. Yarış iştirakçıları ilkin mərhələdə iki qrupda mübarizə aparacaqlar. Qrupların qalibləri öz aralarında keçirəcəkləri final görüşündə kubokun sahibini müəyyənləşdirəcəklər.
Azərbaycan futbolçuları Türkiyə, Özbəkistan və Qırğızıstan komandaları ilə birlikdə "A" qrupunda çıxış edəcəklər. "B" qrupunda isə İspaniya, Gürcüstan, Qazaxıstan və Tacikistan kollektivləri yarışacaqlar.
Ötən aylarda Astanada (Qazaxıstan) "Prezident kuboku", Kişinyovda isə Moldova Futbol Federasiyasının kuboku yarışlarının qalibi olmuş gənc futbolçularımız "Caspian Cup" turnirində ilk oyunu bu gün qırğızıstanlı yaşıdlarına qarşı keçirəcəklər. İyunun 12-də və 14-də isə onları müvafiq surətdə Özbəkistan və Türkiyə komandaları ilə görüşlər gözləyir.

Oqtay BAYRAMOV, "Xalq qəzeti"