Oyun ərəfəsində "futbolda hər şey olur" deyimini yada salmaqla özümüzü nə qədər ümidləndirməyə çalışsaq da, meydançada baş verən hadisələrin göstərdiyi kimi, gümanlarımızda yanılırmışıq. Alman "maşını" hələ tam gücü ilə işə salınmasa da, onunla bərabər səviyyədə mübarizə aparmaq üçün bütün səylərinə baxmayaraq ustalarımızın ustalığı çatışmadı və Avropa çempionatı - 2012-nin seçmə yarışlarında Azərbaycan komandasının növbəti, beşinci məğlubiyyəti qaçılmaz oldu.
Halbuki görüşün əvvəlində futbolçularımızın bir neçə həmləsi, Aleksandr Çertoqanovla Vüqar Nadirovun təhlükəli zərbələri qonaqlara çətin anlar yaşatdı və azarkeşləri ruhlandırdı. Lakin tədricən hər şey öz yerini tutdu, Almaniya komandası Məsut Özil, Mario Qomes və Andre Şürrlenin üç qolu ilə növbəti 3 xalını qazanaraq "A" qrupunun yenilməz lideri kimi turnir cədvəlinin zirvəsində öz mövqeyini daha da möhkəmləndirdi. Hələ yaxşı ki, Manuel Noyerin qoruduğu qapıda da heç olmasa, bir top görə bildik. Murad Hüseynovun bu qolu komandamızı böyük hesabla məğlubiyyətdən xilas etdi - 1:3.
O Q H M T X
1. Almaniya 7 7 0 0 22-3 21
2. Belçika 7 3 2 2 15-10 11
3. Türkiyə 6 3 1 2 9-7 10
4. Avstriya 6 2 1 3 10-10 7
5. Azərbaycan 6 1 0 5 5-18 3
6. Qazaxıstan 6 1 0 5 2-15 3
Həmin axşam digər qruplarda beş oyun olmuşdur. Bu görüşlərdən dördündə meydança sahibləri qələbə qazanmışlar: Farer adaları - Estoniya -2:0, Belarus-Lüksemburq - 2:0, İsveç-Finlandiya-5:0, Bosniya və Herseqovina-Albaniya - 2:0. San-Marino - Macarıstan matçında isə qonaqların xeyrinə 3:0 hesabı qeydə alınmışdır.
Azərbaycan futbolçuları seçmə yarışlarında növbəti oyunu sentyabrın 2-də keçirəcəklər. Həmin gün yığmamız Belçika komandasını qəbul edəcəkdir.

Oqtay BAYRAMOV, "Xalq qəzeti"