İyunun 6-da Bakının Mərdəkan qəsəbəsində tikilmiş Futbol Mərkəzində "Dalğa Arena" stadionunun və köməkçi meydançanın açılışı olmuşdur.
Azərbaycan futbolunun 100 illiyinə həsr edilmiş yubiley şənliklərində iştirak etmək üçün ölkəmizə gəlmiş FİFA-nın prezidenti Yozef Blatter və UEFA-nın prezidenti Mişel Platini, habelə AFFA-nın rəhbəri Rövnəq Abdullayev açılış mərasimində rəmzi lenti kəsmişlər.
Sonra futbol funksionerləri meydana çıxmışlar. Stadionun mərkəzi dövrəsində toplaşmış gənc futbolçu oğlan və qızlar qonaqları qarşılamışlar. Üzərində FİFA, UEFA və AFFA rəmzləri olan şarlar havaya buraxılmış, sonra qonaqlar stadionun ot örtüyünün keyfiyyətini qiymətləndirmişlər.
Blatter söz vermişdir ki, gələn il 17 yaşlı qızlar arasında futbol üzrə dünya çempionatı yarışlarını izləmək üçün yenidən Azərbaycana gələcəkdir.
Xatırladaq ki, tikintisinə 2010-cu il aprelin 24-də başlanmış "Dalğa Arena" stadionunda 6500 tamaşaçı yeri nəzərdə tutulmuşdur.

AzərTAc