Kosiki karate-do idman növü üzrə beynəlxalq yarış bu dəfə Rusiyanın Noqinsk şəhərində keçirilmişdir. Açıq Dünya Kuboku və Müstəqil Dövlətlər Birliyinin çempionatı çərçivəsində təşkil olunan bu yarışda dünyanın 21 ölkəsindən 25 komanda iştirak etmişdir.
Turnirdə Azərbaycan idmançıları kişilərdən və qadınlardan ibarət iki komanda ilə təmsil olunmuşlar. Yarışlarda hər iki komandamız yüksək nəticə göstərərək, qaliblər pilləsinə qalxmışdır. Komanda hesabında qızlarımız birinci, kişi karateçilərimiz isə ikinci yerə layiq görülmüşlər.
Azərbaycan Kosiki Karate-do Federasiyasından bildirmişlər ki, beynəlxalq yarışda 8 karateçimiz - Nərminə Əliyeva, Lolita Hüseynova, Fuad Əliyev, Vüsal Əliyev, Sergey Jestkov, habelə Milli Aviasiya Akademiyasının tələbələri Yuliya Mustafayeva, Rəşad Quliyev və Ruslan Bərzigyar qalib gəlmişlər. Onu da qeyd edək ki, Azərbaycanın bundan əvvəlki komandaları da Yaponiyada keçirilən beynəlxalq yarışlardan 3 il ardıcıl olaraq Vətənə qələbə diplomu ilə qayıtmışdır. Əlbəttə, bu qələbələrdə Azərbaycan yığmasının baş məşqçisi, Milli Aviasiya Akademiyasında bədən tərbiyəsi kafedrasının dosenti, əməkdar məşqçi Talıb Bərzigiyarovun və "Neftçi" İdman-Sağlamlıq Mərkəzinin karate üzrə baş məşqçisi, əməkdar məşqçi Yuri Mustafayevin layiqli payı vardır.
Gənclərimizin bu çətin idman növü üzrə mötəbər yarışlardan davamlı olaraq qələbə ilə qayıtmaları başqa bir amillə də bağlıdır. Bu, Azərbaycan Kosiki Karate-do Federasiyasının fəxri prezidenti, Milli Aviasiya Akademiyasının rektoru, akademik Arif Paşayevin gənclərə və idmana göstərdiyi böyük qayğının təzahürüdür.

"Sərhədçi" taekvondoçuları gözləyir

Mayın 27-28-də "Sərhədçi" İdman Olimpiya Mərkəzində keçiriləcək taekvondo üzrə "Azerbaijan Open" beynəlxalq turniri, hər şeydən göründüyü kimi, çox mötəbər olacaqdır. Bu barədə məlumat verən azerisport-un yaydığı xəbərdə bildirilir ki, artıq 15 ölkə yarışda iştirakını təsdiqləyib.
Turnirin mükafatları uğrunda mübarizədə Azərbaycan taekvondoçularının rəqibləri Türkiyə, Rusiya, Hindistan, Fransa, Gürcüstan, Ukrayna və digər ölkələrin təmsilçiləri olacaqlar.
Çempionatdan sonra çempionat

Tbilisidə qadınlar arasında şahmat üzrə Avropa çempionatı başa çatdıqdan sonra onun iştirakçılarından 74 nəfəri, o cümlədən 29 qrossmeyster sürətli şahmatda qitə birinciliyinin qaliblərini müəyyənləşdirmək üçün Gürcüstanın digər şəhəri Batumiyə gəlmişdir. İsveçrə sistemi üzrə keçirilən çempionat 11 turdan ibarətdir.
Yarışda Azərbaycanın üç şahmatçısı da mübarizə aparır. İlk altı turda Ülviyyə Fətəliyeva 3,5, Xəyalə İsgəndərova və Səbinə İbrahimova isə 3 xal toplamışlar. Bu turlarda ən yaxşı nəticəni Macarıstan təmsilçisi Hoanq Txan Çanq göstərmişdir - 5,5 xal.
İkinci heç-heçə

Kazanda (Rusiya) iddiaçıların dünya şahmat tacı uğrunda turnirinin final matçında ikinci görüşdə də rəqiblərdən heç biri qələbə qazana bilməmişdir. İsrailli Boris Gelfand və rusiyalı Aleksandr Qrişuk bu dəfə 58-ci gedişdə heç-heçəyə razılaşmışlar.
İki görüşdən sonra matçda hesab 1:1 olmuşdur. Dünən üçüncü görüş keçirilmişdir. Bu gün isə qrossmeysterlər istirahət edəcəklər.

Oqtay BAYRAMOV,"Xalq qəzeti"