Azərbaycan şahmat məktəbinin iki yetirməsi - beynəlxalq ustalar Ülvi Bacarani və Zaur Məmmədov bu günlər Leninqrad vilayətinin Kirişi şəhərində "Dünyanın gənc ulduzları" beynəlxalq turnirində çıxış edirlər. Həmin vilayətin ən güclü gənc şahmatçılarından biri kimi tanınıb 2002-ci ildə faciəli surətdə həlak olmuş Vanya Somovun xatirəsinə həsr edilən bu yarışın mükafatları uğrunda 12 rəqib mübarizə aparır.
Artıq beş turun görüşləri arxada qalmışdır. Bacaraninin hesabında 3 xal vardır və o, ilk üç yeri tutan rusiyalılar Kirill Alekseyenko, Aleksey Qoqarov və erməni Karen Qriqoryandan yarım xal geri qalır.
Dünən yarış iştirakçıları istirahət etmişlər. On bir turdan ibarət turnir mayın 18-də finişə çatacaq.

Oqtay BAYRAMOV, "Xalq qəzeti"