Kazanda keçirilən iddiaçıların dünya şahmat tacı uğrunda matçlarının dörddəbir final mərhələsinin ikinci turunda azərbaycanlı qrossmeysterlər qaralarla oynamış və onların iştirakı ilə keçirilən görüşlərdə qalib yenə müəyyənləşməmişdir.
Bu turda ən gec başa çatan Vladimir Kramnik - Teymur Rəcəbov görüşü olmuşdur. Təmsilçimiz rusiyalı keçmiş dünya çempionunun təşəbbüsü ələ keçirmək üçün bütün cəhdlərinin qarşısını bacarıqla almış və 61-ci gedişdə rəqiblər heç-heçəyə razılaşmışlar. Görüşü chesspro.ru saytında şərh edən rusiyalı mütəxəssis Konstantin Sakayev Teymurun imtahandan şərəflə çıxdığını və layiqli heç-heçəyə nail olduğunu qeyd etmişdir. Bu görüşdən sonra matçda hesab 1:1 olmuşdur.
Şəhriyar Məmmədyarovun da Boris Gelfandla matçında iki görüşdən sonra rəqiblərdən heç biri hesabda irəli çıxa bilməmişdir. Ağ fiqurlarla israilli qrossmeysterin oynadığı ikinci görüşdə 40-cı gedişdən sonra "dinc" nəticə qeydə alınmışdır.
Digər iki matça gəldikdə, Aleksandr Qrişuk (Rusiya) - Levon Aronyan (Ermənistan) qarşılaşmasında da qrossmeysterlərdən heç biri ilk iki görüşdə öz üstünlüyünü sübuta yetirə bilməmişdir (1:1). Qata Kamski (ABŞ) isə ikinci turda qaralarla qələbə sayəsində Veselin Topalov (Bolqarıstan) ilə matçda hesabda irəli çıxmağı bacarmışdır - 1,5: 0,5.
Dünən axşam üçüncü turun görüşləri keçirilmişdir. Bu turda Məmmədyarov da, Rəcəbov da ağ fiqurlarla oynamağa hazırlaşırdılar.