Bu il iyulun ikinci yarısında Çin Xalq Respublikasının Ninqbo şəhərində keçiriləcək kişilərdən ibarət komandalar arasında şahmat üzrə dünya çempionatında on ölkənin təmsilçiləri iştirak edəcəklər. FİDE-nin saytında verilən məlumata görə çempion adı uğrunda Çin, Azərbaycan, Rusiya, Ukrayna, İsrail, Macarıstan, Hindistan, ABŞ, Misir və Ermənistan komandaları mübarizə aparacaqlar.
Tbilisi qadın şahmatçıları gözləyir
Gürcüstan paytaxtında qadın şahmatçılar arasında şəxsi Avropa çempionatının açılış mərasiminə üç həftə qalır. Artıq qitənin bir çox ölkəsini təmsil edən 131 nəfər, o cümlədən 62 qrossmeyster mayın 7-dən 18-dək keçiriləcək çempionatda iştirakını təsdiqləmişdir.
Tbilisiyə səfərə Azərbaycanın 13 şahmatçısı da hazırlaşır. Çempionatın saytında yerləşdirilmiş siyahıda bunlar Zeynəb və Türkan Məmmədyarovalar, Gülnar Məmmədova, Nərmin Kazımova, Nərgiz Umudova, Xəyalə Abdulla, Xəyalə İsgəndərova, Pərvanə İsmayılova, Səbinə İbrahimova, Nərmin Xələfova, Ülviyyə Fətəliyeva, Səbinə Quliyeva və Nərmin Söyünlüdür.
Avropa birinciliyi iştirakçılarının siyahısına reytinqə görə Nana Dzaqnidze (Gürcüstan) və Nadejda Kosintseva (Rusiya) başçılıq edirlər. Onların hər ikisinin reytinqi 2567-dir.

Oqtay BAYRAMOV, "Xalq qəzeti"