Bu gün üç oyunla Unibank Premyer Liqasında final mərhələsinin 5-ci turuna start veriləcəkdir. İki görüş birinci altılıqda mübarizə aparıb yüksək iddialarla yaşayan komandaların iştirakı ilə keçiriləcəkdir: "Xəzər-Lənkəran" - "İnter" və "Bakı" - "Qarabağ". 
Sabaha təyin edilmiş "Neftçi" - AZAL görüşü də azarkeşlərə prinsipial mübarizə vəd edir. Lider növbəti qələbə qazanıb turnir cədvəlinin zirvəsində mövqeyini daha da möhkəmləndirmək əzmindədir, "təyyarəçilər" isə finişə mükafatçılar sırasında çatmaq imkanını özlərində saxlamaq üçün qələbəyə can atmalıdırlar.
Turun qalan üç oyununda ikinci altılıq komandaları üz-üzə gələcəklər: "Muğan" - "Turan" (16 aprel), "Qəbələ" - "Simurq" və MOİK - "Gəncə" (hər ikisi aprelin 17-də keçiriləcəkdir).
Bu tur ərəfəsində liderlər üçlüyünü təşkil edən "Neftçi"nin 56, Lənkəran klubunun 50, "Qarabağ"ın 49 xalı var.

Liderlərin yarım addımlığında

"Dubay Open" beynəlxalq turnirinin beşinci turunda Azərbaycanın beş şahmatçısından yalnız Sərxan Quliyev qələbə qazana bilmişdir. O, Melisse Qriffə (CAR) qalib gəlmişdir. Qədir Hüseynov ardıcıl iki qələbədən sonra hindistanlı Sundar Syamla heç-heçəyə razılaşmışdır.
Beş turdan sonra hər iki qrossmeysterimizin 4 xalı var və onlar ilk üç yeri bölüşdürən Hindistan təmsilçiləri Krişnan Saşikiran, Negi Parimarjan və gürcüstanlı Mixail Mçedlişvilidən yarım xal geri qalırlar.
Dünən turnirdə istirahət günü idi. Bu gün isə rəqiblər iki turun görüşlərində mübarizə aparacaqlar.

Oqtay BAYRAMOV, "Xalq qəzeti"