“Futbolhd.ru” saytının məlumatına görə, Madridin “Real” klubu belçikalı qapıçı Tibo Kurtua və braziliyalı yarımmüdafiəçi Vilyama görə Londonun “Çelsi” klubuna 112 milyon avro təklif edib. Bildirilir ki, Kurtua “Real”a keçməyə razıdır.  Əgər “Çelsi” klubu avqustun 9-na kimi Tibo Kurtua üçün əvəzləyici tapsa, qapıçı “Real” klubuna transfer oluna bilər.

Xatırladaq ki, T.Kurtua 2014-cü ildən “Çelsi” klubunun şərəfini qoruyur. O, London klubunun heyətində 126 oyuna çıxıb, 71 oyunda qapısını toxunulmaz saxlayıb. Vilyam isə 2013-cü ildən “Çelsi” klubunun formasını geyinir. Keçən mövsüm İngiltərə Premyer Liqasında 55 oyunda əsas  heyətdə meydana çıxan braziliyalı yarımmüdafiəçi 13 dəfə fərqlənib və 8 dəfə məhsuldar ötürmə ilə yadda qalıb.

Qeyd edək ki, Rusiyada keçirilən dünya çempionatında Tibo mundialın ən yaxşı qapıçısı “Qızıl əlcək” mükafatı alıb. Vilyamın komandası Braziliya millisi isə dörddəbir final mərhələsində Belçikaya məğlub olaraq turnirdə mübarizəsini dayandırıb.

Elçin ABBASOV,

“Xalq qəzeti”