Qrossmeyster Şəhriyar Məmmədyarov İsveçrənin Bil şəhərində keçirilən beynəlxalq turnirin ikinci dövrəsinə də qələbə ilə başlamışdır. Şahmatçımız altıncı turda qara fiqurlarla 39-cu gedişdə isveçrəli Niko Georgiadisə qalib gələrək bu yarışda təşkilatçıların nəzərdə tutduqları yeganə istirahət gününü turnir cədvəlinin zirvəsində qarşılamışdır.

 

Hesabat turunun digər iki görüşündə Maksim Vaşye-Laqrav (Fransa) Pyotr Svidler (Rusiya) üzərində qələbə qazanmış, çexiyalı David Navara ilə norveçli dünya çempionu Maqnus Karlsen isə heç-heçəyə razılaşmışlar.

Altı turdan sonra turnir cədvəlinə tək-tənha başçılıq etməklə pərəstişkarlarına xoş anlar yaşadan Məmmədyarovun 4,5 xalı var və o, ikinci pillədə olan Karlsendən yarım xal irəlidədir. Svidler, Navara və Vaşye-Laqrav 3 xal toplamışlar, Georgiadis isə cəmi yarım xal qazana bilmişdir.

Dünən turnirdə istirahət günü idi. Bu gün keçiriləcək yeddinci turda Məmmədyarov ağlarla Navaranı sınağa çəkəcək, həmçinin Karlsen – Vaşye-Laqrav və Georgiadis – 

Svidler görüşləri oynanılacaq.

Oqtay BAYRAMOV,

“Xalq qəzeti”