Bu gün saat 22-də Moskvanın “Lujniki” stadionunda başlanacaq Xorvatiya–İngiltərə yarımfinal görüşündə futbol üzrə 21-ci dünya çempionatının ikinci finalçısı da məlum olacaq. Bu oyun ərəfəsində Xorvatiya komandasının hücumçusu Mario Mancukiç  jurnalistlərə bildirmişdir ki, rəqiblərin qələbə imkanları eynidir.

 

O, fikrini belə ifadə etmişdir: – Dünya çempionatının yarımfinalını Çempionlar Liqasının finalı ilə müqayisə edə bilmərəm. Yığma və klub tamamilə başqa anlayışlardır. Biz bütün ölkə qarşısında məsuliyyət hiss edirik, Xorvatiya naminə oynayırıq. Ola bilsin, İngiltərə ilə müqayisədə bizim təcrübəli oyunçularımız daha çoxdur. Amma imkanlar 50-50-yədir. Biz heç kimdən qorxmuruq, rəqiblərimizə hörmətlə yanaşırıq və öz oyunumuzu göstərməyə çalışacağıq...

Əlavə edək ki, Xorvatiya–İngiltərə görüşündə ədaləti türkiyəli hakimlər briqadası qoruyacaq. Baş hakim rolunda Cüneyt Çakır çıxış edəcək.

* * *

Dünən ilk yarımfinal görüşündə Fransa millisi Belçika komandasına 1:0 hesabı ilə qalib gələrək finala çıxmışdır.  

Oqtay BAYRAMOV,

“Xalq qəzeti”