Fransanın Eks-le-Ben şəhərində keçirilən Avropanın şəxsi çempionatında birgünlük istirahətdən sonra Azərbaycan şahmatçısı Rauf Məmmədov səkkizinci turda növbəti qələbəsini qazanmışdır. Qrossmeysterimiz bu dəfə qara fiqurlarla danimarkalı Yon Lüdviq Hammeri məğlubiyyətlə barışmağa məcbur edərək çempionatın altı liderindən biri olmuşdur.
Finişə üç tur qalmış Məmmədov, rusiyalılar Vladimir Potkin və Nikita Vityukov, Avstriya şahmatçısı Markus Ragger, Viorel İordanesku (Moldova) və rumın Mirça-Emilian Parliqrasın hərəyə 6,5 xalı vardır. Onlar turnir cədvəlində ən yaxın izləyicilərindən yarım addım irəlidədirlər.
Səkkizinci tur daha dörd təmsilçimiz üçün uğurlu olmuşdur. Namiq Quliyev Sergey Fyodorçuka (Ukrayna), Vasif Durarbəyli Vladislav Tkaçova (Fransa), Rüfət Bağırov Denis Kadriçə (Bosniya və Hersoqovina), Kənan İzzət Anastasios Pavlidisə (Yunanıstan) qalib gəlmişlər. Eltac Səfərli, Qədir Hüseynov və Nicat Məmmədov isə bu turda xal ehtiyatlarını artıra bilməmişlər.
Dünən axşam keçirilən doqquzuncu turda Rauf Məmmədov Markus Ragger ilə görüşmüşdür.

Oqtay BAYRAMOV, "Xalq qəzeti"