Bu gün Mingəçevirdəki "Kür" Olimpiya Tədris-İdman Mərkəzində beynəlxalq "Prezident kuboku" reqatasına start veriləcəkdir. Azərbaycan Gənclər və İdman Nazirliyinin mətbuat xidmətinin bu barədə yaydığı xəbərdə bildirilir ki, yarışda dörd ölkə - Azərbaycan, Rusiya, Ukrayna və Gürcüstanın 100-dən çox avarçəkəni mübarizə aparacaq.
Sayca dördüncü dəfə keçiriləcək Mingəçevir reqatasının təşkilatçıları Gənclər və İdman Nazirliyi ilə Azərbaycan Milli Avarçəkmə Federasiyasıdır. Bu startları qarşıdakı məsul sınaqlara, o cümlədən dünya və Avropa çempionatlarına, London Olimpiadası - 2012-yə lisenziya xarakterli yarışlara hazırlığın bir mərhələsi də hesab etmək olar.

Aprelin 27-də və mayın 4-də
Futbol üzrə Azərbaycan kuboku yarışlarının finalçıları aprelin 27-də və mayın 4-də keçiriləcək yarımfinal görüşlərindən sonra məlum olacaq. Finalın astanasında azarkeşləri "Xəzər-Lənkəran" - "Bakı" və "İnter" - AZAL görüşləri gözləyir.
Yarımfinalların qalibləri mayın 24-də Tofiq Bəhramov adına Respublika stadionunda keçiriləcək final görüşündə ölkə kubokunun sahibini müəyyənləşdirəcəklər.

Oqtay BAYRAMOV, "Xalq qəzeti"