Azərbaycan idmançıları üç gün ərzində Milli Gimnastika Arenasında yüksək səviyyədə təşkil edilib iştirakçılara və tamaşaçılara xoş təsir bağışlayan batut üzərində tullanışlar və tamblinq üzrə 26-cı Avropa çempionatında ölkəmizə 1 qızıl və 1 gümüş medal qazandırmışlar.

Tamblinq yarışında Mixail Malkin bütün rəqiblərindən daha inamla çıxış edərək Avropa çempionu kimi fəxri kürsünün ən yüksək pilləsində təbrikləri qəbul etmişdir.

Təmsilçilərimiz gümüş medala isə qadınların batut üzərində sinxron yarışlarında sahib olmuşlar. Yaxşı hazırlıq nümayiş etdirən Veronika Zemlyanaya–Svetlana Makştarova dueti gərgin mübarizədə ikinci nəticə göstərmişdir.

İyirmi beş ölkədən 400-dən çox gimnastın iştirak etdiyi Avropa çempionatı Azərbaycan idmanı tarixində növbəti mötəbər hadisə idi. İdmançılarımızın qazandıqları medallar isə bu hadisəyə layiqli töhfə oldu.

Oqtay BAYRAMOV,

“Xalq qəzeti”