Slovakiyanın Visokiye Tatrı şəhərində keçirilən qadınlar arasında şəxsi Avropa çempionatının ilk iki turunda 144 iştirakçıdan (onlardan 77-si qrossmeysterdir) yalnız 13-ü maksimum nəticə göstərə bilmişdir.

Start turlarını itkisiz başa vuranlardan biri də Azərbaycan milli komandasının üzvü Günay Məmmədzadədir. Şahmatçımız ilk iki görüşdə slovakiyalı Alyona Mrvovaya və polşalı Anna Varakomskaya qalib gəlmişdir.

Çempionatda iştirak edən digər Azərbaycan şahmatçılarından Gülnar Məmmədova 1,5, Ülviyyə Fətəliyeva, Zeynəb və Türkan Məmmədyarovalar 1, Xanım Balacayeva 0,5 xal toplamışlar.

On bir turdan ibarət Avropa çempionatında dünən 3-cü turun görüşləri keçirilmişdir. Məmmədzadə bu dəfə Mariya Muziçuka (Ukrayna) qarşı oynamışdır.

Oqtay  BAYRAMOV,
“Xalq qəzeti”