Futbol pərəstişkarları bu suala bir həftədən sonra  qəti cavab alacaqlar.  UEFA Çempionlar Liqası turnirinin dörddəbir final mərhələsinin birinci  raundunun ilk iki oyununda  İspaniyanın “Real” (Madrid) və Almaniyanın  “Bavariya” komandaları yarımfinal  yolunda  özlərinə  əla zəmin  yaratmışlar.

“Kral klubu” İtaliyanın Turin şəhərində  türkiyəli hakim Çüneyt Çakırın idarə etdiyi oyunda  “Yuventus”u ağır məğlubiyyətə uğratmışdır – 3:0. Oyunun qəhrəmanı isə iki  qolun  müəllifi Kriştianu Ronaldu olmuşdur.

“Bavariya” da rəqib meydanında qələbə qazanmışdır.  Almaniya  təmsilçisi İspaniyanın Sevilya şəhərində eyniadlı yerli kluba 2:1  hesabı ilə  qalib  gəlmişdir.

Madrid və  Münhendə  cavab görüşləri  aprelin 11-də oynanılacaq.

O.BAYRAMOV,
“Xalq qəzeti”