Topaz Premyer Liqasında 21-ci turun “Kəpəz”–“Zirə” (0:0), “Qarabağ”–“Keşlə” (1:1), “Qəbələ”–“Sumqayıt” (1:1) və “Neftçi”–“Səbail” (2:0) görüşləri ilə üçüncü dövrə başa çatmışdır. İndi rəqibləri çempionatın finişindən cəmi bir dövrə ayırır.

Ötən turdan sonra çempionluğa əsas namizədlərin göstəriciləri arasındakı fərq dəyişməmişdir. “Qarabağ” (50 xal) turnir cədvəlində ən yaxın izləyicisi “Qəbələ”dən (40) əvvəlkitək 10 xal irəlidədir.

Əvəzində bürünc medallar uğrunda mübarizə getdikcə daha kəskin şəkil alır. Bu gün üçüncü pillədə irəliləyən “Sumqayıt”ın 35, dördüncü yerdə olan “Zirə”nin 34 xalı var. “Neftçi” isə növbəti qələbədən sonra xal ehtiyatını 30-a çatdıraraq bürünc medallara iddiaçılara bir qədər də yaxınlaşmışdır.

Dördüncü dövrənin oyunları aprelin 7-də (“Qarabağ”–“Səbail”, “Kəpəz”–“Keşlə”) və 8-də (“Neftçi”–“Sumqayıt”, “Zirə”–“Qəbələ”) keçiriləcəkdir.

Oqtay BAYRAMOV,
“Xalq qəzeti”