Beynəlxalq Şahmat Federasiyası (FİDE) 2018-ci il aprelin 1-nə olan vəziyyətə görə reytinq cədvəlini dərc etdirmişdir. Ötən ay Berlində dünya şahmat tacına iddiaçıların turnirində ikinci nəticə göstərmiş azərbaycanlı qrossmeyster Şəhriyar Məmmədyarov 2814 xalla əvvəlkitək norveçli dünya çempionu Maqnus Karlsendən (2843) sonra ikinci pillədədir.

Siyahıda birinci onluğa Karlsen və Məmmədyarovla yanaşı, həmçinin Fabiano Karuana (ABŞ, 2804), Vladimir Kramnik (Rusiya, 2792), Maksim Vaşye-Laqrav (Fransa, 2789), Hikaru Nakamura (ABŞ, 2787), Uesli So (ABŞ, 2786), Din Lijen (Çin, 2778), Sergey Karyakin (Rusiya, 2778) və Aniş Giri (Hollandiya, 2777) daxildirlər.

Xüsusi qeyd edək ki, hazırda dünyanın ən yüksək reytinqli on qrossmeysterindən altısı–Karlsen, Məmmədyarov, Kramnik, Karyakin, Giri və Lijen Şəmkirdə Vüqar Həşimovun xatirəsinə həsr edilən V beynəlxalq turnirdə (18-28 aprel) oynayacaqlar. Onlardan başqa xatirə turnirində, artıq xəbər verdiyimiz kimi, Veselin Topalov (Bolqarıstan), David Navara (Çexiya), habelə Teymur Rəcəbov və Rauf Məmmədov da çıxış edəcəklər.

Oqtay BAYRAMOV,
“Xalq qəzeti”