Berlində keçirilən dünya şahmat tacına iddiaçıların turnirinin 13-cü  turunun nəticələri: Şəhriyar Məmmədyarov (Azərbaycan) – Aleksandr Qrişuk (Rusiya) – 1:0, Fabiano Karuana (ABŞ) – Levon Aronyan (Ermənistan) – 1:0.  Uesli So (ABŞ) – Sergey Karyakin (Rusiya) – 0,5:0,5,  Din Lijen (Çin) – Vladimir Kramnik (Rusiya) – 0,5–0,5.

Son tur ərəfəsində lider Karuananın 8, onun ən yaxın izləyiciləri Məmmədyarovla Karyakinin 7,5 xalı var.

Noyabrda Londonda hazırkı dünya çempionu Maqnus Karlsenlə tac uğrunda  matçda  qarşılaşacaq rəqib bu gün keçiriləcək sonuncu turda müəyyənləşəcək. Yeganə vəsiqəyə sahib olmaq imkanını özündə  saxlayan Məmmədyarov finişdə qaralarla Kramnikə qarşı oynayacaq, həmçinin Qrişuk – Karuana, Karyakin – Lijen və Aronyan – So görüşləri keçiriləcəkdir.

“Xalq qəzeti”