Azərbaycanın 21 yaşlılardan ibarət yığma komandasının futbolçuları 2019-cu il Avropa çempionatının seçmə yarışları çərçivəsində növbəti oyun keçirmişlər. Millimiz Mitrovitsa şəhərində Kosovo komandasının qonağı olmuşdur.

Oyun 2:0 hesabı ilə meydan sahiblərinin xeyrinə başa çatmışdır. Bu rəqiblərin çıxış etdikləri 5-ci qrupda həmin gün keçirilmiş digər görüşdə isə Almaniya futbolçuları İsrail komandasını üç cavabsız qolla məğlubiyyətə uğratmışlar.

Qrupda lider 6 oyunda 15 xal toplamış Almaniya komandasıdır. Azərbaycan futbolçuları 1 xalla sonuncu yerdədirlər. Bu qrupa Azərbaycan, Kosovo, Almaniya, İsrail yığmaları ilə yanaşı Norveç və İrlandiya komandaları da daxildirlər. Yığmamız növbəti oyunu martın 27-də rəqib meydanında İrlandiya futbolçularına qarşı keçirəcəkdir.

“Xalq qəzeti”