Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti Abşeron rayonunda “Əmək haqqının ödənilməsinin formaları, qaydaları və əmək haqqından tutulmalar” mövzusunda seminar keçirib.

İşəgötürənlərin nümayəndələrinin iştirakı ilə keçən tədbirdə öncə əmək haqqının verilməsinin müddətləri ilə bağlı əmək qanunvericiliyində əksini tapan prinsiplərdən bəhs olunub. Əmək haqqının illik dövr üçün hesablanan işçilərə ayda bir dəfədən az olmayan müddətdə verilməli olduğu, kollektiv müqavilədə, yaxud əmək müqaviləsində əmək haqqının verilməsinin başqa müddətlərinin də müəyyən edilə bildiyi diqqətə çatdırılıb. Əmək haqqının verilməsinin işəgötürənin təqsiri üzündən gecikdirildiyi hallarla bağlı qanunvericiliyin tələbləri barədə də iştirakçılar ətraflı məlumatlandırılıb.

Seminarda əmək haqqından tutulmalara yol verilən hallar və bunun icrası qaydası da qeyd olunub, əmək haqqından tutulan məbləğlərin miqdarının məhdudlaşdırılması ilə bağlı hüquqi prinsiplər diqqətə çatdırılıb.

İştirakçıların müvafiq iş ilinə görə məzuniyyətə çıxmış və həmin iş ili bitənədək işdən çıxdığı halda məzuniyyətin işlənməmiş günlərinə düşən məzuniyyət pulunun ödənilməsi, işçinin müəssisənin gəlirindən pay almaq hüququ, qanunvericilikdə nəzərdə tutulmuş hallarda işçilərə digər təminatların verilməsinin tənzimlənməsi qaydaları və s. barədə sualları da cavablandırılıb.

Zərifə BƏŞİRQIZI,
“Xalq qəzeti”