Xan Bağı adi bağlardan deyil. O, Qafqazın və Azərbaycanın ən qədim parklarından biridir. Park bitki florasının zənginliyinə görə bütün ölkədə məşhurdur. Ağacların növ tərkibi yerli cinslər hesabına hər il artırılır. Burada xiyabanlar salınmış, yay teatr binası, müxtəlif istirahət güşələri, su hovuzları, fəvvarələr tikilmişdir. Parkın yaraşıqlı yerlərindən biri də onun mərkəzində yerləşən əzəmətli çinar xiyabanıdır. Cərgələnən çinarlar arasında su hovuzları və fəvvarələr düzəldilmişdir. 

Hazırda burada yazın gəlişi ilə bağlı genişmiqyaslı təmizlik və abadlıq işləri aparılır. Şəhərin havasının saf qalmasında, yay mövsümündə, qızmar günəşin, qışda soyuq küləklərin qarşısının alınmasında müstəsna rol oynayan parkda yaşıllıq sahələrinə xüsusi qulluq göstərilir. Şəhər sakinlərinin və qonaqların sevimli istirahət yeri olan bu ərazi bu gün möcüzəli məkana çevrilib. Parkın əməkdaşları səliqə-sahmanın, yaşıllığın qorunması üçün var qüvvələri ilə çalışırlar.Yeni əkilən gül və çiçək kolları parkın gözəlliyinə daha bir gözəllik gətirmişdir.        

Şəhər əhalisinin başlıca istirahət yeri olan «Xan Bağı»nda xalq şairi Nigar Rəfibəylinin heykəli, ilk azərbaycanlı Sovet İttifaqı Qəhrəmanı İsrafil Məmmədovun qəbri, Gəncə qala divarının qalığı, eləcə də «Yaşıl Teatr» və sair vardır.

                   Hamlet Qasımov,
“Xalq qəzeti”nin bölgə müxbiri