Təhsil Nazirliyi ölkə Prezidentinin sərəncamı ilə əməkhaqları artırılan təhsil işçilərinin sayını açıqlayıb. 

Nazirliyin mətbuat xidmətindən verilən məlumata görə, Azərbaycan Prezidenti İlham Əliyevin “Təhsil müəssisələrində çalışan işçilərin əməkhaqlarının artırılması haqqında” 28 fevral 2018-ci il tarixli sərəncamı, təxminən, 240 min təhsil işçisinə şamil edilir. Bu sərəncama əsasən, dövlət büdcəsindən maliyyələşdirilən təhsil müəssisələrində (ali təhsil müəssisələri istisna olmaqla) çalışan işçilərin aylıq vəzifə maaşları 2018-ci il martın 1-dən orta hesabla 10 faiz artırılıb.

Xatırladaq ki, 2014-cü ildən etibarən ölkə üzrə, ümumilikdə, 140 minədək müəllim diaqnostik qiymətləndirmədən keçib. Dövlət başçısının müvafiq sərəncamlarına əsasən, diaqnostik qiymətləndirilmədən keçən bütün müəllimlərin əməkhaqları artırılıb.

R.TAHİR,
“xalq qəzeti”