Soyuqbulaqlar, Qarayazı, Soyuqbulaq  və Həzi Aslanov qəsəbələrinin sakinləri yəqin ki, bu su çərşənbəsini heç vaxt unutmayacaqlar. Çünki Novruzun ilk çərşənbəsi-su çərşənbəsi günü bu qəsəbələrə su xəttinin təntənəli açılış mərasimi oldu.

Qarayazı qəsəbəsinin mərkəzində keçirilən mərasimi giriş sözü ilə açan rayon icra hakimiyyətinin başçısı Məhərrəm Quliyev qəsəbələrin sakinlərini bu əlamətdar hadisə münasibəti ilə təbirk etdi. O, bu qəsəbələrə ölkə rəhbərinin müvafiq Sərəncamı ilə içməli suyun verilməsinin  Novruz bayramının gəlişindən xəbər verən su çərşənbəsi ilə bir günə təsadüf etməsini sözün əsl mənasında hər birimizdə yüksək bayram ovqatı yaratdığını bildirdi, ölkə rəhbərliyinin müvafiq tapşırıqlarına uyğun olaraq son zamanlar rayonda görülən işlərdən geniş söhbət açdı.

Mərasimdə iştirak edən “Azərsu” ASC-nin sədr müavini Köçəri Həsənov, “Birləşmiş Sukanal” MMC-nin direktoru Ramin Sadıqov da qəsəbə sakinlərini təbrik etdilər.

Tədbirdə şəhid ailəsinin üzvü Teymur Qurbanov, ağsaqqal Elxan Mustafayev, ziyalılar Mais Bəhrəmov, Fəramiz Məmmədov və başqaları bildirdilər ki, bu yaşayış məntəqələrinin yüz faiz qazlaşdırılması, ötən ilin sonunda rayon mərkəzi ilə birbaşa əlaqə yaradan avtomobil yolunun əsaslı şəkildə yenidən qurulması, indi isə yeni içməli su xəttinin istismara verilməsi onlara göstərilən yüksək dövlət qayğısının bariz nümunəsidir. Bütün bu işlərə görə Prezidentimiz İlham Əliyevə yerli ictimayiət adından dərin “çox sağ olun” deyirik.

Hamlet Qasımov,
“Xalq qəzeti”nin bölgə müxbiri