Gəncə Şəhər İcra Hakimiyyətinin başçısı Elmar Vəliyev şəhərsalma ilə bağlı keçirdiyi görüşdə bu barədə memarlarla müzakirələr aparıb. İcra hakimiyyətinin başçısı bildirib ki, Gəncə şəhərində sıxlığın aradan qaldırılması, yöndəmsiz evlərin sökülməsi məqsədi ilə xüsusi plan hazırlanır.

     Bu plana uyğun olaraq söküləcək evlərin yerində iki bloklu hündür mərtəbəli binalar inşa olunacaq. Binaların alt hissəsində avtomobil dayanacağı, birinci və ikinci mərtəbələrdə alış-veriş mərkəzi olacaqdır.

Şəhərin Nizami prospektinin 50 metr enində genişləndirilməsi zamanı yolun eninə uyğun olaraq Gəncəçayın üzərindəki körpü də yenidən qurulacaq. Ümumilikdə 1,5 kilometr məsafədə sıxlığın aradan qaldırılması nəzərdə tutulub.        Layihə çərçivəsində Gəncədə sosial təyinatli obyektlər də inşa olunacaq. Şəhər rəhbəri bildirib ki, qədimliyi qoruyub saxlamaqla Gəncənin müasirləşməsinə, gözəlləşməsinə xidmət edəcək layihə çərçivəsində Qəmbər Hüseynli küçəsindən Əttarlar küçəsinədək Nizami prospektinin sağ tərəfində tikiləcək 10 ədəd 9 çoxmərtəbəli binanın ən yaxşı layihəsi üçün memarlar arasında müsabiqə elan olunub.

Yeni inşa olunacaq binalarda ilk növbədə evi söküləcək 150 ailə yerləşdiriləcək. Digər mənzillər isə ipoteka və kredit yolu ilə vətəndaşlara satılacaq. Yeni layihənin həyata keçirilməsi Gəncədə nəqliyyat tıxacının qarşısının alınmasına da şərait yaradacaq.

    Hamlet Qasımov,
“Xalq qəzeti”nin bölgə müxbiri