Əmək və Əhalinin Sosial Müdafiəsi Nazirliyi (ƏƏSMN) tərəfindən ictimaiyyətlə əlaqələrin təşkilində və ictimai məlumatlandırmada sosial şəbəkələrdən istifadəyə xüsusi önəm verilir. 

Bu sahədə aparılan işlərin davamı kimi, son bir ildə ƏƏSMN-nin fəaliyyət istiqamətləri üzrə həyata keçirilən tədbirlər barədə hazırlanmış 400-dən çox məlumat aidiyyəti foto və video materiallarla birlikdə nazirliyin rəsmi facebook səhifəsində yerləşdirilib. Hazırda bu səhifənin izləyicilərinin sayı 43 mindən çoxdur ki, bu da mərkəzi icra hakimiyyəti orqanları arasında ən yüksək göstəricilərdən biridir.

Nazirliyin rəsmi facebook səhifəsi vasitəsilə vətəndaşların müvafiq sahələrlə bağlı müraciətlərinin cavablandırılması işi də aparılır. Ötən il həmin səhifə vasitəsilə vətəndaşlar tərəfindən edilmiş 2173 müraciətin cavablandırılması təmin edilib. Müraciətlərin 61,6 faizi sosial təminat növləri, 8,8 faizi məşğulluğun təminatı, 7,5 faizi əlillərin tibbi-sosial ekspertizası və reabilitasiyası, 5 faizi əmək qanunvericiliyi, qalan hissəsi isə nazirliyin səlahiyyət dairəsinə aid digər məsələlərlə bağlı olub. Böyük əksəriyyəti sorğu xarakteri daşıyan həmin müraciətlər nazirliyin aidiyyatı bölmələrinin məsul şəxslərinin iştirakı ilə  vətəndaşların müraciətlərinə baxılması qaydası haqqında qanunvericiliyə uyğun şəkildə cavablandırılıb.

ƏƏSMN-nin ictimaiyyətlə əlaqələr şöbəsindən bildiriblər ki, Youtube kanalında  2017-ci il ərzində nazirliyin tədbirləri ilə bağlı 100-ə  yaxın videosüjet yerləşdirilib. Eyni zamanda, ötən il nazirliyin İnstagram səhifəsi də fəaliyyətə başlayıb, həmçinin twitter hesabı daimi olaraq yenilənir.

Qeyd olunan sosial şəbəkələrə girişi daha da asanlaşdırmaq üçün Əmək və Əhalinin Sosial Müdafiəsi Nazirliyinin rəsmi internet saytında (www.mlspp.gov.az) onlara birbaşa keçid linkləri də yaradılıb.

Zərifə BƏŞİRQIZI,
“Xalq qəzeti”