“Azərsu” Açıq Səhmdar Cəmiyyətinin Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “ASAN xidmət” mərkəzlərində təmsil olunması istehlakçılara göstərilən müştəri  xidmətlərini asanlaşdırır və bu sahədə şəffaflığın  artırılmasını təmin edir.

2016-cı ildə “ASAN xidmət” mərkəzlərinin əhatə dairəsinin genişlənməsi daha böyük istehlakçı qruplarının  “Azərsu” ASC-nin təqdim etdiyi  xidmətlərdən istifadəsinə şərait yaratmışdır.

Ötən il “ASAN xidmət” mərkəzlərində fəaliyyət göstərən “Azərsu” ASC-nin  xidmət bölmələrinə vətəndaşlar tərəfindən müxtəlif məsələlərlə bağlı 26565 müraciət edilmişdir. Müraciətlərin 7905-i smart kartlara yükləmələr haqqında məlumatın verilməsi, 5694-ü yararsız vəziyyətə düşmüş smart kartların bərpası, 4652-si isə abonent məlumatlarına dəyişikliklərin edilməsi ilə bağlı olmuşdur. Bununla yanaşı, məcburi köçkün qrupuna aid abonentlərin limitlərinin smart-karta yüklənməsi ilə bağlı 2156, ödənişlə bağlı 1907, borclar haqqında məlumatların verilməsi ilə bağlı 2113, digər məsələlərlə bağlı  2138 müraciət daxil olmuşdur. Ən çox müraciət isə (7382) Sabunçu rayonundakı 4 saylı “ASAN xidmət” mərkəzində qeydə alınmışdır.

Xatırladaq ki, “ASAN xidmət” mərkəzlərində “Azərsu” ASC-nin müştəri xidmətlərinin göstərilməsinə 2014-cü ilin may ayından başlanılmışdır. “Azərsu” ASC-nin müştəri xidmətləri ilə bağlı 2014-cü ildə 10013, 2015-ci ildə 17108 və 2016-cı ildə 26565 olmaqla, ümumilikdə 53686 müraciət daxil olmuşdur. Ötən müddətdə “Azərsu” ASC-nin xidmətləri paytaxtın Nərimanov rayonu ərazisində yerləşən 1, Xətai rayonundakı 2, Yasamal rayonundakı 3, Sabunçu rayonundakı 4 və Nizami rayonundakı 5 saylı, həmçinin  Sumqayıt, Gəncə, Sabirabad, Bərdə, Qəbələ və Masallı şəhərlərindəki  “ASAN xidmət”  mərkəzlərində təşkil olunmuşdur.

M. YAQUBZADƏ,
“Xalq qəzeti”