Sahibsiz Uşaqlara Kömək İctimai Birliyi fiziki imkanları məhdud uşaq, yeniyetmə və gənclərlə bağlı yeni layihəyə başlayıb.

Azərbaycan Respublikası Prezidenti yanında QHT-lərə Dövlət Dəstəyi Şurasının maliyyə dəstəyi ilə baş tutan "İrəliyə doğru bir addım" adlı layihədə fiziki imkanları məhdud uşaq, yeniyetmə və gənclərin istirahətinin səmərəli təşkili ilə yanaşı, onların kompüter bacarıqlarının inkişafı nəzərdə tutulub. Birlikdən verilən məlumata görə, layihənin məqsədi fiziki imkanları məhdud uşaq, yeniyetmə və gənclərin cəmiyyətə inteqrasiyasına dəstək olmaq, onların digər yaşıdları ilə  bərabər şəkildə imkan və potensialını üzə çıxarmalarına stimul verməkdir.  İştirakçılara kompüterdən istifadə bacarıqları ilə yanaşı,  psixoloji xidmətlər də göstəriləcək. 

 Layihə çərçivəsində əlil uşaq, yeniyetmə və gənclərin asudə vaxtının səmərəli təşkili üçün  Nabrana 3 günlük tur təşkil ediləcək. 

Qeyd edək ki, layihə avqustun 1-dən noyabrın 1-ə qədər müddəti əhatə edir. 

Əfsanə BAYRAMQIZI,
 "Xalq qəzeti"