Azərbaycan Respublikası Prezidentinin sərəncamı ilə elan edilmiş “Multikulturalizm ili” ilə əlaqədar Azərbaycan Respublikası Prezidenti yanında Bilik Fondu və Şəmkirdə Heydər Əliyev Mərkəzinin birgə təşkilatçılğı ilə Şəmkir şəhərində yerləşən Alman Lüteran kilsəsində Bakı Beynəlxalq Multikulturalizm Mərkəzinin nəşr etdiyi “Azərbaycan multikulturalizminin ədəbi-bədii qaynaqları” kitabının təqdimatı keçirilib.

Tədbirdə Şəmkir Rayon İcra Hakimiyyətinin başçısı Alimpaşa Məmmədov, Azərbaycan Respublikası Prezidenti yanında Bilik Fondunun nümayəndəsi Ceyhun Musaoğlu, müxtəlif icmaların rəhbərləri, din xadimləri və rayon ictimayətinin nümayəndələri iştirak etmişlər.

Rayon icra hakimiyyətinin başçısı  Alimpaşa Məmmədov öz çıxışında Şəmkir əhalisinin daim multikultural dəyərlərə hörmətlə yanaşdığını, müxtəlif xalqların və dini icmaların birgə, problemsiz yaşadığını və bundan sonra da belə olacağına əminliyini ifadə etmişdir.

Daha sonra Azərbaycan Respublikasının Prezidenti yanında Bilik Fondunun nümayəndəsi Ceyhun Musaoğlu çıxış edərək, fondun gördüyü işlər və bu ilin fevralında Şəmkirdə Heydər Əliyev Mərkəzi ilə imzalanmış əməkdaşlıq haqqında niyyət protokoluna əsasən, Şəmkirdə həyata keçiriləcək layihələr haqqında məlumat vermişdir.

Sonda iştirakçılar üçün orqan musiqisi ifa olunmuşdur.