Milli Ordu sıralarına yolasalma mərasimləri Lənkəranda hər zaman yüksək təntənə ilə keçirilir. Bu dəfə isə tədbir xüsusilə yaddaqalan olub.

Əvvəlcə mərasim iştirakçıları – rayon rəsmiləri, hüquq-mühafizə orqanlarının rəhbərləri və çağırışçılar  Heydər Əliyev Xatirə Parkında ulu öndərin abidəsini ziyarət edib, önünə tər gül dəstələri qoyublar.

Sonra Heydər Əliyev Mərkəzinin qarşısında təntənəli mərasim keçirilib. Lənkəran ŞİH-nin başçısı Taleh Qaraşov ordu sıralarına yola düşən gəncləri təbrik edərək onlara yaxşı yol, uğurlu hərbi xidmət arzulayıb. Bildirib ki, ümummilli liderimizin siyasi kursunu layiqincə davam etdirən Azərbaycan Prezidenti, Silahlı Qüvvələrimizin Ali Baş Komandanı İlham Əliyev bu gün  Silahlı Qüvvələrimizin müasir hərbi texnika ilə təchiz edilməsinə, möhkəm nizam-intizamı, döyüş ruhu ilə seçilən və düşmənə sarsıdıcı zərbələr vurmağa qadir olan ordunun formalaşmasına nail olmuşdur. Hərbi xidmətə yola düşən gənclərin vətən borcunu layiqincə yerinə yetirəcəklərinə əminliyini ifadə edən rayon rəhbəri xalqın onlara böyük inam bəslədiyini  söyləyib.

Sonra icra başçısı ordu sıralarından yenicə təxris olunan gənclərin bir qrupuna hərbi biletlərini təqdim edib.

Səfərbərlik və Hərbi Xidmətə Çağırış üzrə Dövlət Xidməti Lənkəran rayon şöbəsinin rəisi, Azərbaycan Vətən Müharibəsi Veteranları İctimai Birliyi cənub bölməsinin sədri, çağırışçıların valideynləri də ürək sözlərini dilə gətiriblər. Çağırışçı gənclər və ordudan təxris olunmuş əsgərlər Vətənin müdafiəsinin onlara etibar edilməsindən qürur duyduqlarını bildiriblər. Sonra məktəblilərin, tələbələrin və incəsənət ustalarının ifasında vətənpərvərlik, qəhrəmanlıq mövzusunda şeirlər səslənib, mahnılar ifa edilib.

Sonda çağırışçılar Azərbaycan bayrağını öpərək onun altından keçib və ordu sıralarına yola düşüblər.

Əli NƏCƏFXANLI,
“Xalq qəzeti”nin bölgə müxbiri