Prezident İlham Əliyevin tapşırığına əsasən respublikamızın şəhər və rayonlarının IX-XI sinif şagirdlərinin bölgələrimizlə tanışlığı məqsədilə “Ölkəmizi tanıyaq” devizi altında keçirilən tur-aksiyaya Sabirabad məktəbliləri də qoşulublar.

Qeyd edək ki, milli mədəniyyətimizin, adət-ənənələrimizin, müstəqillik illərində əldə olunmuş nailiyyətlərimizin dərindən öyrənilməsi məqsədilə müxtəlif şəhər və rayonlarda yaşayan yeniyetmələrin digər bölgələrə səyahətlərinin təşkili ilə bağlı martın 16-da Sabirabad rayonundan 40 nəfər IX-XI sinif şagirdi Gəncə bölgəsinə yola salındı. Onlar bölgənin görməli yerləri, mədəniyyət abidələri, yerli adət-ənənələri ilə tanış olacaqlar.

Yolasalma mərasimində çıxış edən Sabirabad Rayon İcra Hakimiyyəti başçısının birinci müavini Həsən Həsənov tur-aksiyaların məktəblilərin vətənpərvərlik tərbiyəsində xüsusi əhəmiyyətə malik olduğunu vurğuladı. O, məktəblilərə səyahət etdikləri bölgənin tarixini dərindən öyrənməyi tövsiyə etmişdir.

Məktəbliləri yola salan valideyn və müəllimlər onlara mənalı istirahət, zəngin təəssürat arzulamışlar.

Səməd HÜSEYNOĞLU,
“Xalq qəzeti”nin bölgə müxbiri