Azərbaycan Gözdən Əlillər Cəmiyyətinin  ötənilki  fəaliyyətinin yekunlarına həsr olunmuş  iclasda  ilkin  olaraq  Xocalı soqırımı  şəhidlərinin  xatirəsi  anıldı. Bildirildi ki, bu  faciə Azərbaycan xalqına qarşı  törədilən amansız  soyqırımı hadisəsidir.

Tədbirdə hesabat məruzəsi ilə çıxış edən  cəmiyyətin sədri Səmyar Abdullayev ötən il   görülmüş işlərdən, həyata keçirilən tədbirlərdən danışdı. Bildirdi ki, 2015-ci ildə  maliyyə  çətinliklərinə baxmayaraq  Gözdən Əlillər  Cəmiyyəti  bir  sıra  layihələrin  reallaşmasını təmin etmişdir. Ötən il  cəmiyyətin   Brayl İnformasiya  Resurs  Mərkəzi  Əmək və Əhalinin  Sosial Müdafiəsi Nazirliyinin  maliyyə dəstəyi ilə   “Sağlamlıq  imkanları məhdud  uşaqlar üçün xüsusi proqramlar əsasında  idman, incəsənət, xalq  sənət növlərinin öyrədilməsinə  yardım göstərilməsi” layihəsinin davamlılığını təmin etmişdir.  “Sərhədsiz  incəsənət”  layihəsi çərçivəsində  15 cizgi  filmi  və iki bədii  film istehsal olunaraq  gözdən əlil insanlar üçün nümayiş etdirilmişdir. Respublika Məşğulluq  Xidmətinin  maliyyə dəstəyi ilə  “Əlil ziyalılar” İctimai Birliyi  cəmiyyətlə birgə  kompüter  və ingilis dili kursları təşkil  etmişlər.

Cəmiyyətin  sədrinin  sözlərinə  görə   Asiya Müsəlmanları Komitəsinin Azərbaycandakı Nümayəndəliyinin maliyyə dəstəyi ilə  250 min manat dəyərində   poliqrafiya  avadanlıqları alınması barədə müqavilə imzalanmış  və yaxın vaxtlarda həmin avadanlıqlar   cəmiyyətə təqdim olunacaq.

Qeyd olundu ki, bu yaxınlarda  gözdən əlil  insanlar üçün  yeni 132 mənzilli binanın istifadəyə verilməsi dövlətin  əlillərə göstərdiyi qayğı və diqqətin bariz nümunəsidir. Azərbaycan Prezidenti  cənab İlham Əliyevin iştirakı ilə  keçirilən açılış mərasimində   gözdən əlillər   ölkə başçısına  belə  yüksək  qayğıya görə dərin minnətdarlıqlarını bildirmişlər. Həmin  görüşdə  cənab Prezident  bildirmişdir ki, “Bu, gözdən əlillər üçün tikilmiş xüsusi bir binadır. Sizdən başqa burada heç kim yaşamayacaq. ”

Bir neçə il əvvəl də  gözdən əlillər  üçün belə bir  yaşayış binası istifadəyə verildiyi  diqqətə  çatdırıldı. Hazırda həmin  binada  gözdən əlillər  rahat  yaşayırlar.

Təkcə   gözdən əlillər  üçün deyil,  digər  fiziki  qüsurlu  insanlara da  qayğı  dövlət siyasətinin prioritetlərindən biridir. Bu siyasətdə  başlıca məqsəd  fiziki  qüsurlu insanların   cəmiyyətə inteqrasiyasını sürətləndirmək,  onları   cəmiyyətin  fəal üzvlərinə çevirməkdir.  Bu  gün   gözdən əlillər Paralimpiya oyunlarında, müxtəlif səviyyəli festivallarda uğurla iştirak edir, möhtəşəm qələbələr qazanırlar.

Cəmiyyətin  rəhbərliyinin təşəbbüsü ilə respublikamızda tikilən və  Qafqazda analoqu olmayan  Reabilitasiya Mərkəzi  bütün gözdən əlil vətəndaşların istifadəsinə verilmiş ən mükəmməl və məhz gözdən əlillər üçün  xüsusiləşdirilmiş məkana çevrilmişdir. Rabitə və İnformasiya Texnologiyaları Nazirliyinin “Dilmanc” layihəsi çərçivəsində gözdən əlillər üçün işlənib hazırlanmış DİLMANC mini kompüteri də əlillərə ən yaxşı töhfədir. 

Heydər Əliyev Fondunun layihəsi əsasında Rabitə və İnformasiya Texnologiyaları Nazirliyi ilə birgə regionlarda fiziki imkanları məhdud insanlar üçün informasiya  resurs mərkəzləri tikilir. Digər tərəfdən, yol infrastrukturlarında, yeraltı keçidlərdə əlillər üçün də xüsusi şərait yaradılır. Səsli işıqforlar quraşdırılır. Şübhəsiz ki, bütün bunlar əlillərə xüsusi qayğıdır.

Cəmiyyətin sədri qeyd etdi ki, Heydər Əliyev Fondunun prezideni, UNESCO-nun  və İSESCO-nun xoşməramlı səfiri, Milli Məclisin  deputatı Mehriban xanım Əliyevanın əvəzsiz xidmətlərini bir daha vurğulamaq lazımdır.  Diqqət çəkən məqamlardan biri də odur ki, əlillər, o cümlədən gözdən əlillər işlə təmin olunur, onlara yeni ixtisaslar öyrədilir. Gözdən əlillər üçün ali və orta ixtisas, peşə müəssisələrində spesifik fakültələrin yaradılması diqqət mərkəzindədir, tibbi kolleclərin birinin nəzdində gözdən əlillər üçün xüsusi masaj ixtisası üzrə fakültə yaradılmışdır. Burada gözdən əlillər müalicəvi və idman masajı ixtisasına yiyələnirlər. Bununla da onların işlə təminatında problemləri qismən aradan  qaldırılır. Artıq beş yüzdən çox əlil müxtəlif özəl və dövlət tibb müəssisələrində, klinikalarda işlə təmin olunub. Rəhbərlik etdiyim cəmiyyətin üzvləri möhtərəm Prezidentimizin yürütdüyü daxili və xarici siyasəti dəstəkləyirlər. Xalqımızın cənab İlham Əliyevə olan ehtiram və inamı sonsuzdur.

Sonra  çıxış edənlər əlillərə  göstərdiyi  qayğıya  görə ölkə başçısına dərin minnətdarlıqlarını bildirdilər.

M. MÜKƏRRƏMOĞLU,
“Xalq qəzeti”