Fevralın 25-də “ADA” Universitetində “İstedadlarla karyera imkanları arasında körpü” adlı dördüncü karyera həftəsi keçirilib.

AZƏRTAC xəbər verir ki, tədbirin təşkilinin məqsədi “ADA” Universitetinin tələbə və məzunlarını ölkəmizdəki iş bazarının imkanları ilə tanış etmək, gənclərin istedadını daha səmərəli təqdim etmək, inkişafda olan sənaye sahələri, dövlət və özəl sektorun insan kapitalı ehtiyacı barədə aydın təsəvvür yaratmaqdır. 

“ADA” Universiteti və “Azərsun Holdinq”in birgə təşkil etdiyi karyera həftəsində 40-dan çox şirkətin iştirakı ilə sərgi və təqdimatlar, hazırkı iqtisadi vəziyyətdə iş axtarışı, ixtisarlar zamanı karyera ilə bağlı necə düzgün qərarlar verməli, korporativ əlaqələrin qurulması, liderliyin inkişafı və s. mövzularda seminarlar keçirilib.

“ADA” Universitetinin uğurlu karyeraya başlayan məzunları təcrübələrini tələbələrlə bölüşüb, onlara tövsiyələrini veriblər. Tədbirdə “ADA” Universitetinin 1000-dən çox tələbə və məzunu iştirak edib.