Heydər Əliyev Fondunun təşəbbüsü ilə həyata keçirilən xeyirxah tədbirlərdən biri də talassemiyalı və hemofiliyadan əziyyət çəkən xəstələrə kömək məqsədilə təşkil olunan könüllü qanvermə aksiyalarıdır. Cəlilabadda növbəti belə aksiya uğurla başa çatıb.

Sübh tezdən sakinlər böyük həvəslə Mərkəzi Rayon Xəstəxanasına gələrək burada Səhiyyə Nazirliyinin təşkilatçılığı ilə keçirilən könüllü aksiyaya qatılıblar. Aksiyanın normal keçməsindən ötrü xəstəxanada hər cür lazımi şərait yaradılmışdı. Donorlar qeydiyyatdan keçdikdən sonra xüsusi ayrılmış yerlərdə könüllü və təmənnasız surətdə qan veriblər.

Cəlilabad Rayon İcra Hakimiyyətinin başçısı Əziz Əzizov, hüquq-mühafizə orqanlarının rəhbərləri, ayrı-ayrı kollektivlərin üzvləri könüllü aksiyada iştirak ediblər. Rayonun təhsil və səhiyyə işçiləri aksiyada fəallıqları ilə seçiliblər. Mərkəzi Rayon Xəstəxanasının baş həkimi İlham Əliyev deyib ki, aksiyada toplanan qan Elmi Tədqiqat Hematologiya və Transfiziologiya İnstitutunda yoxlanıldıqdan sonra Mərkəzi Qan Bankına göndəriləcək və irsi qan xəstələrinin müalicəsində istifadə ediləcək. Günün yekununda məlum olub ki, aksiyada 115 nəfər insan qan verərək talassemiyalı uşaqların həyatının xilasına kömək göstərmələrindən məmnun qalıblar. Donorlardan Cavid Əsgərov, Bəturə Xəlilova, İslam Cəfərov və başqaları könüllü aksiyada iştirak etmələrindən sevinc hissilə bəhs edib, gələcəkdə də belə xeyirxah tədbirlərə həvəslə qatılacaqlarını bildiriblər.

Əli NƏCƏFXANLI,
“Xalq qəzeti”nin
bölgə müxbiri