Gədəbəyin iki kəndinə ilk dəfə təbii qaz çəkilişi münasibətilə keçirilən toplantıda rayon ictimaiyyətinin nümayəndələri, kənd sakinləri iştirak etmişlər.

Tədbiri giriş sözü ilə rayon icra hakimiyyətinin başçısı Ramiz Yediyarov açaraq qeyd etmişdir ki, Azərbaycan Respublikasının  Prezidenti cənab İlham Əliyevin diqqət və qayğısı ilə respublikamızın hər yerində olduğu kimi, Gədəbəy rayonunda da geniş tikinti-abadlıq işləri aparılır, kəndlərimiz bir-birinin ardınca qazlaşdırılır. Biz bu diqqət və qayğıya görə cənab Prezidentimizə öz dərin minnətdarlığımızı bildirir və əmin edirik ki, əlimizdən gələni əsirgəməyəcəyik.

Tədbirdə kənd sakinlərinin də bir neçə nəfəri   çıxış edərək qaz çəkilişinə görə ölkə Prezidentinə minnətdarlıqlarını bildirmişlər.

Sakinlərə məlumat verilmişdir ki, 492 abonenti olan Parakənd və Leşkər kəndlərinin qazlaşdırılması məqsədilə birpilləli sistem əsasında müxtəlif diametrli 36 min 499 metrlik metal borularla daşıyıcı və məhəllədaxili qaz xətləri çəkilib, 492 ədəd sayğac və fərdi tənzimləyici quraşdırılıb.

Tədbirin sonunda rayon icra hakimiyyətinin başçısı Ramiz Yediyarov Şəmkir Regional Qaz İstismar İdarəsinin nümayəndəsi Orucəli Məmmədovla    birlikdə kəndə təbii qaz verilişinin rəmzi əlaməti olan məşəli yandırmışlar.

Hamlet QASIMOV,
“Xalq qəzeti”nin
bölgə müxbiri