Son vaxtlar Şəmkirdə  inşa olunan və ya əsaslı şəkildə tamamilə yenidən qurulan məktəb binalarının, uşaq bağçalarının- körpələr evlərinin, digər sosial obyektlərin sayı artır.

Bu günlərdə daha bir sosial obyekt – Dəllər qəsəbə 2 saylı körpələr evi-uşaq bağçası müasir standartlara uyğun şəkildə əsaslı təmirdən sonra balacaların istifadəsinə verilmişdir. Bununla bağlı keçirilən mərasimdə Şəmkir Rayon İcra Hakimiyyətinin başçısı Alimpaşa Məmmədov, RİH başçısı aparatının məsul işçiləri, ictimaiyyətin nümayəndələri, müəllimlər və valideynlər iştirak etmişlər.

Alimpaşa Məmmədov tədbirdə çıxış edərək yeni bağçanın açılışı münasibətilə rayon əhalisini təbrik etmiş və kollektivə uğurlar arzulamışdır. O, bildirmişdir ki, Azərbaycan Respublikasının Prezidenti cənab İlham Əliyevin rəhbərliyi və birbaşa köməkliyi sayəsində qəbul edilmiş dövlət proqramlarının icrası Şəmkir rayonunda uğurla həyata keçirilir. Bu gun rayonda əsaslı işlər aparılır. Açılışına yığışdığımız bu tərbiyə ocağında kollektiv üçün gözəl şərait yaradılmışdır. Son illər rayonda bir neçə təhsil – tərbiyə ocağı tikilərək istifadəyə verilmiş və bu işlər bundan sonra da davam etdiriləcəkdir.

Daha sonra icra hakimiyyətinin başçısı rəsmi açılışı bildirən qırmızı lenti kəsmişdir. Qonaqlar binada yaradılmış şəraitlə tanış olmuşlar. Bağça 55 yerlikdir və üç qrupdan ibarətdir. Binanın məşğələ və yataq, mətbəx, oyun və yardımçı otaqları var,  müasir istilik sistemi  quraşdırılmışdır.

Burada çalışan müəllim kollektivi və qəsəbə sakinləri yaradılan şəraitə görə ölkə rəhbərliyinə minnətdarlıqlarını bildirmişlər.

Hamlet QASIMOV,
“Xalq qəzeti”nin
bölgə müxbiri