Bu gün Naxçıvan Muxtar Respublikası öz inkişafının yeni mərhələsinə qədəm qoymuşdur. Həyata keçirilən islahatlar Şərur rayonunda da sosial tədbirlərin əhatə dairəsini genişləndirmişdir. Rayonun Yuxarı Yaycı kəndi quruculuq tədbirlərindən sonra abadlaşmış, müasir infrastruktur yaradılmışdır.

Bu il Yuxarı Yaycı kənd tam orta məktəbinin binasında da yenidənqurma işləri aparılmışdır. Naxçıvan Muxtar Respublikası Ali Məclisinin sədri Vasif Talıbov Yuxarı Yaycı kənd tam orta məktəbinə gəlmiş, yaradılan şəraitlə maraqlanmışdır.

Məlumat verilmişdir ki, 2 mərtəbədən ibarət olan 144 yerlik məktəb binasında 3-ü elektron lövhəli olmaqla 12 sinif otağı, kimya-biologiya laboratoriyası, hərbi kabinə, şahmat sinfi, kompüter otağı, müəllimlər otağı, kitabxana, bufet və idman zalı vardır. Məktəbin həyətində isə açıq idman qurğuları qoyulmuşdur. Binada müasir tədris-texniki avadanlıqlar quraşdırılmış, zəngin fondu olan kitabxana istifadəyə verilmişdir.

Məktəbin müəllimləri ilə görüş zamanı “Məktəb yalnız savadlı gənclər deyil, həm də ölkəmiz üçün layiqli vətəndaşlar yetişdirməlidir”, - deyən Ali Məclisin sədri Yuxarı Yaycı kənd tam orta məktəbinin nailiyyətlərinin qənaətləndirici olduğunu bildirmiş, bu münasibətlə kollektivə təşəkkür etmişdir.

Gənc müəllim Mirsədi Nemətov minnətdarlıq edərək demişdir ki, çalışacağıq, gənclər dövlətçiliyimizə sədaqət ruhunda böyüsünlər, yaxşı təhsil alaraq ölkəmizə və xalqımıza layiqli vətəndaş kimi yetişsinlər.

*    *    *

Həmin gün Yuxarı Yaycı Kənd Mərkəzinin də açılışı olmuşdur.

Şərur Rayon İcra Hakimiyyətinin başçısı İbrahim Məmmədov çıxış edərək demişdir ki, artıq Şərur rayonunun 40 kəndi kompleks abadlaşdırılmışdır. Yuxarı Yaycı kəndində yaradılan infrastrukturlar da kəndin inkişafında yeni mərhələnin əsasını qoymuşdur. Başçı yaradılan şəraitə görə rayon sakinləri adından minnətdarlıq etmişdir.

Naxçıvan Muxtar Respublikası Ali Məclisinin sədri Vasif Talıbov Yuxarı Yaycı kəndinin muxtar respublikanın abad yaşayış məntəqələri sırasına daxil olduğunu bildirmiş,  sakinləri təbrik etmişdir.

Açılışı bildirən lent kəsildikdən sonra kənd mərkəzinə baxış olmuşdur.

*    *    *

Daha sonraYuxarı Yaycı kəndində yeni Xidmət Mərkəzi istifadəyə verilmişdir. Naxçıvan Muxtar Respublikası Ali Məclisinin sədri Vasif Talıbov açılışı bildirən lenti kəsmişdir.

Xidmət mərkəzi cari ildə kənddə aparılan quruculuq işləri çərçivəsində inşa edilmişdir. Binada bərbərxana və mağaza fəaliyyət göstərir. Ticarət və məişət xidmətlərinin təşkili sakinlərin rahatlığını təmin etmişdir.

*    *    *

Bu il Yuxarı Yaycı kənd avtomobil yolu da yenidən qurulmuşdur. Açılış mərasimində Ali Məclisin sədri Vasif Talıbov yeni yolun istifadəyə verilməsi münasibətilə sakinləri təbrik etmişdir.

Məlumat verilmişdir ki, 5,7 kilometr uzunluğunda yol genişləndirilmiş, asfalt örtük salınmış, 1 selötürücü, 48 su keçidi tikilmiş, 390 metr beton kanal çəkilmişdir. Yolun müasir tələblər səviyyəsində yenidən qurulması nəqliyyat vasitələrinin rahat və təhlükəsiz hərəkətinə imkan verəcəkdir.

*    *    *

Aparılan tikinti quruculuq işləri zamanı kəndin rabitə, içməli su, elektrik və təbii qaz təchizatı da yaxşılaşdırılmış, 4800 metr rabitə, 1400 metr elektrik və 300 metr məsafədə qaz xətləri çəkilmişdir.

“Xalq qəzeti”