Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi mətbuat xidmətinin yaydığı məlumatda  bildirilir ki, dünyanın tanınmış konsaltinq və audit şirkəti “Pricewaterhouse Coopers” (PwC)  dünyanın 18 iri şəhərində yerləşən və “bir pəncərə” prinsipi ilə dövlət xidmətlərinin göstərildiyi çoxfunksiyalı mərkəzlərin (ÇFM) işini təhlil edib.

PwC-nin “Dövlət və bələdiyyə xidmətlərinin göstərilməsi mərkəzinin müqayisəli təhlili” adlı araşdırmasına əsasən, vətəndaşlar arayış və icazələri ən asan Bakı, Moskva və San-Pauloda əldə edə bilirlər.

Araşdırmada Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan “ASAN xidmət” mərkəzlərində növbələrin idarə olunması, ən rahat mərkəz və vətəndaşla dialoq göstəricisinə görə  Bakı  lider şəhərlər arasında olub.

Eyni zamanda, araşdırmada qeyd olunur ki, telefon qaynar xətti bütün şəhərlərdə var, amma əks əlaqə operativ pultu yalnız Bakı, Sidney, Moskva və Helsinkidə işləyir.

Qiymətləndirmə dörd meyar (xidmətlərin əlçatanlığı, rahatlıq, növbələrin idarə olunması, əks əlaqə) üzrə   Bakı (Azərbaycan), Moskva (Rusiya), Madrid (İspaniya), San-Paulo (Braziliya), Berlin (Almaniya), London (İngiltərə), Seul (Cənubi Koreya), Sidney (Avstraliya), Amsterdam (Niderland), Toronto (Kanada), Afina (Yunanıstan), Astana (Qazaxıstan), Budapeşt (Macarıstan), Banqalor (Hindistan), Oklend (Yeni Zelandiya), Helsinki (Finlandiya), Stokholm (İsveç)  və Santyaqo (Çili) şəhərlərində aparılıb.

Xatırladaq ki, Azərbaycanda dövlət qurumlarının fəaliyyətində informasiya-kommunikasiya texnologiyalarının tətbiqi istiqamətində son illərdə əhəmiyyətli işlər görülüb, müvafiq hüquqi baza formalaşdırılıb. Əksər dövlət orqanlarında əhaliyə elektron xidmətlərin göstərilməsi təmin edilib. Bu xidmətlər bürokratik əngəllərin və korrupsiya hallarının aradan qaldırılmasına öz müsbət təsirini göstərib. 2012-ci il iyul ayının 13-də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin yaradılması ilə bu sahədə mühüm islahata imza atılıb. Həmin ilin dekabrında isə Bakıda pilot layihə olan 1 saylı “ASAN xidmət” mərkəzi fəaliyyətə başlayıb. Sonra paytaxtın bir neçə rayonunda da “ASAN xidmət” sakinlərin istifadəsinə verilib. Bu proses regionları da əhatə edib. Hazırda ölkə üzrə 8 “ASAN xidmət” mərkəzi fəaliyyət göstərir. Onlardan 4-ü paytaxtda, 4-ü isə regional mərkəz olmaqla Sumqayıt, Gəncə, Sabirabad və Bərdədədir. Artıq Bakı şəhər 5 saylı “ASAN” xidmət mərkəzi də fəaliyyətə başlayıb.   

Hazırda bu mərkəzlərə daxil olan müraciətlər arasında şəxsiyyət vəsiqələrinin alınması və dəyişdirilməsi, sürücülük vəsiqələrinin dəyişdirilməsi, notariat fəaliyyəti, eləcə də miqrasiya və əmlak məsələləri ilə bağlı olan xidmətlər üstünlük təşkil edir. Əgər əvvəllər “ASAN xidmət” mərkəzlərində 23 hüquqi xidmət həyata keçirilirdisə, indi 10 dövlət orqanı tərəfindən 30 növ xidmət göstərilir. Eyni zamanda, mərkəzlərdə 30 növ funksional yardımçı xidmətlər təşkil edilib. Bütün bunlar dövlət qulluqçusu-vətəndaş münasibətlərində yeni yanaşmanın formalaşmasında Azərbaycan dövlətinin həyata keçirdiyi siyasətin mühüm tərkib hissəsidir. Bütün  mərkəzlərdə    internetə açıq olan kompüterlər qoyulub və vətəndaşların bütün növ elektron xidmətlərdən yararlanması üçün şərait yaradılıb.

“ASAN xidmət” mərkəzlərində vətəndaşların gözləməsi və vaxtını səmərəli keçirməsi üçün funksional yardımçı xidmətlər – bank, sığorta, hüquqi yardım və tərcümə mərkəzləri, laboratoriya, tibbi xidmət, poçt şöbələri, fotostudiya fəaliyyət göstərir. Xüsusi terminallar vasitəsilə mobil rabitə, internet, işıq, su, qaz və digər kommunal xidmətlərin, kredit və sığorta ödənişlərinin həyata keçirilməsi mümkündür. Xidmət sistemi müasir İP telefon və İP şəbəkə ilə təmin edilib.

“ASAN xidmət” mərkəzinin fəaliyyətinin məqsədi dövlət orqanlarının hüquqi xidmətlərinin göstərilməsində vətəndaşların razı salınması, şəffaflığın təmin edilməsi, korrupsiya hallarının tam aradan qaldırılması, müasir texnologiyaların, “bir pəncərə” prinsipinin tətbiq olunması, dövlət qulluqçusu-vətəndaş münasibətlərində yeni düşüncə tərzinin - “dövlət qulluqçusunun vəzifəsi vətəndaşın hüququnu təmin etməkdir” yanaşmasının formalaşdırılmasıdır.

Fəaliyyətə başladığı gündən “ASAN xidmət” mərkəzlərinə 5 milyon 500 minədək vətəndaş müraciəti qeydə alınıb. Gün ərzində “ASAN xidmət” mərkəzlərinə 15-16 min vətəndaş müraciət edir. 2013-cü ildən “ASAN xidmət” mərkəzlərinin təsis edilmədiyi regionların əhalisinə xidmətlərin çatdırılması məqsədi ilə xüsusi avtobuslar vasitəsilə səyyar xidmətlər göstərilir. Bu günədək 200 minədək vətəndaş bu xidmətdən yararlanıb. Xüsusi qayğıya ehtiyacı olan 500-dək əlil vətəndaşa xidmətlər ödənişsiz həyata keçirilib. Prezident İlham Əliyevin tapşırığına əsasən, regionlarda yaşayan əhaliyə səyyar xidmətlərin keyfiyyətli və davamlı şəkildə göstərilməsinin təşkili məqsədilə səyyar xidmət avtobuslarının sayı artırılaraq 10-a çatdırılıb.

Vətəndaşların “ASAN xidmət” mərkəzlərinə müraciəti, eyni zamanda, Çağrı Mərkəzi və sosial şəbəkələr vasitəsilə həyata keçirilir. 2013-cü il fevralın 1-dən fəaliyyətdə olan Çağrı Mərkəzində 594 min 103 zəng qeydə alınıb. Gündəlik zənglərin sayı 1000-1500-dür. Bundan əlavə, sosial şəbəkələr vasitəsilə 150 mindən çox müraciət qəbul edilib. Bu günədək xidmət mərkəzlərində keçirilmiş 43 dövri rəy sorğusuna əsasən vətəndaşların “ASAN xidmət”lərdən məmnunluğu 98-100 faiz arasında dəyişir. “ASAN xidmət” mərkəzlərində insan resursları və təlimlərə xüsusi önəm verilir.

Vaqif BAYRAMOV,
“Xalq qəzeti”