Azərbaycan Prezidenti İlham Əliyevin tapşırığına əsasən, ölkəmizin bölgələrində nazir və komitə sədrləri tərəfindən vətəndaşların qəbulu davam edir.

Ailə, Qadın və Uşaq Problemləri üzrə Dövlət Komitəsinin (AQUPDK) sədri Hicran Hüseynova avqustun 25-də Sumqayıtda yerləşən Qubadlı rayon təhsil şöbəsində Sumqayıt şəhərinin və Abşeron, Qubadlı, Şuşa, Zəngilan rayonlarından olan vətəndaşları qəbul edib.

AQUPDK-dan bildiriblər ki, qəbulda 32 vətəndaş öz problemləri ilə bağlı müraciət edib. Vətəndaşları qəbul edən komitə sədri onların problemlərini dinləyərək, bir çoxunun yerindəcə həllinə nail olub. Bu müraciətlər arasında qadın hüquqlarının müdafiəsi, məşğulluq, sağlamlıq və digər məsələlər yer tutur.

Eyni zamanda, komitənin fəaliyyətinə aid olmayan digər məsələlərlə bağlı müraciətlərə baxılıb, onların araşdırılması üçün aidiyyəti üzrə göndərilməsi təmin olunub.

AZƏRTAC