İyulun 31-də Dövlət Sərhəd Xidmətinin (DSX) Lənkəran sərhəd dəstəsində gənc əsgərlərin andiçmə mərasimi keçirilib. AZƏRTAC xəbər verir ki, andiçmə mərasimində DSX-nin rəisi, Sərhəd Qoşunlarının komandanı, general-polkovnik Elçin Quliyevin təbriki şəxsi heyətə çatdırılıb.

Mərasimdə çıxış edənlər gənc əsgərləri və onların valideynlərini Dövlət Sərhəd Xidmətinin sıralarına qatılmaları münasibətilə təbrik ediblər.

Çıxışlarda milli sərhəd strategiyasının təməlini qoyan ulu öndərin dövlət sərhədlərimizin qorunmasına xüsusi diqqət yetirərək DSX-nin yaradılması barədə tarixi qərarının ölkəmizin sərhəd mühafizəsi tarixində yeni mərhələ olduğu, Silahlı Qüvvələrin Ali Baş Komandanı, Prezident İlham Əliyevin diqqət və qayğısı sayəsində respublikamızın sərhəd mühafizəsinin ən müasir tələblər səviyyəsinə qaldırıldığı, dövlət sərhədlərimizin toxunulmazlığının təmin olunması istiqamətində davamlı inkişafa nail olunduğu diqqətə çatdırılıb.

Çıxış edənlər Vətənə, dövlətə sədaqət andı içərək müqəddəs sərhədlərimizi şərəflə qorumaq məsuliyyətini öz üzərlərinə götürən gənc əsgərlərə uğurlar arzulayıb, onlar üçün yaradılmış ideal şəraitdən bəhrələnərək xidmətdə yüksək nəticələrə nail olacaqlarına və hərbi anda sadiq qalacaqlarına əminliklərini ifadə ediblər.

Gənc əsgərlərin valideynləri yaradılmış şəraitə görə dövlətimizin başçısına minnətdarlıqlarını bildirib, öz övladlarına Vətən sərhədlərinin keşiyində ayıq-sayıq dayanmağı tapşırıblar.

Tədbir gənc əsgərlərin tribuna önündən təntənəli keçidi ilə başa çatıb.