Azərbaycan dövlətinin qurucusu, ümummilli lider Heydər Əliyev bütün dövrlərdə mədəniyyətimizin,  incəsənətimizin yüksəlişinə xüsusi  diqqət yetirmiş, tarixi abidələrimizin, milli-mənəvi dəyərlərin qorunub saxlanılmasını və daha da inkişaf etdirilməsini ən vacib prioritetlərdən, təxirəsalınmaz hədəflərdən  biri  kimi  qarşıya qoymuşdur.

Bu gün qürur və fərəh hissi ilə deyə bilərik ki, ulu öndərin bu kursu  ölkə  Prezidenti İlham Əliyev tərəfindən böyük  uğur  və yaradıcılıqla davam etdirilir.  2003-cü  ildən  bəri  mədəniyyət və incəsənət sahəsində  həyata keçirilən ciddi  islahatlar, bu istiqamətdə  qəbul olunan dövlət proqramları, imzalanan fərman  və  sərəncamlar dediklərimizə əyani  sübutdur.  Dövlət başçısının uzaqgörən  siyasəti  və birbaşa  rəhbərliyi  ilə respublikamızda, o  cümlədən  rayonumuzda  mədəniyyət  müəssisələrinin  maddi-texniki bazasının  möhkəmləndirilməsi, yeni obyektlərin  tikilməsi,  əsaslı təmiri, bu  sahədə  çalışanların  əmək haqqının vaxtaşırı artırılması, onların fəxri adlarla təltif edilməsi  və s.  bizə  göstərilən gündəlik  diqqət və qayğıdan  xəbər verir.

Bu gün ciddi məsuliyyət hissi ilə bildirmək istəyirəm ki,  Bərdə Rayon Mədəniyyət  və Turizm Şöbəsinin kollektivi bu istiqamətdə  qarşıya qoyulmuş  əsas  vəzifələrin – ölkə Prezidentinin  məqsədyönlü və davamlı  sosial-iqtisadi,  mədəni  siyasətinin  əhali arasında  təbliği,  qədim, zəngin  milli-mənəvi irs və  dəyərlərimizin  yaşadılması, inkişaf  etdirilməsi, əhaliyə göstərilən  mədəni  xidmətin  məzmunca yeniləşdirilməsi  ilə bağlı  vəzifələrin yerinə yetirilməsi  üçün bütün imkan, səy  və bacarıqlarını  səfərbərliyə almışdır. Əldə  etdiyimiz  nəticələr  isə,  həqiqətən, sevindiricidir.

Belə bir  faktı  açıq etiraf  etmək  lazımdır ki, uzun illər Bərdə  deyəndə  yada  ancaq  pambıq,  taxıl  və s.  yada  düşürdü,  əsas diqqət  və  səylər  də məhz  həmin  sahələrə  yönəldilirdi.  Heç də təsadüfi deyildir ki,  ötən əsrin 70-80-ci  illərində,  ulu öndər respublikaya   rəhbərlik  etdiyi dövrdə  Bərdə   keçmiş  SSRİ-nin  ən böyük  pambıq  istehsal  edən  rayonu  idi.  Ancaq  təəssüflər  olsun ki,  ötən  əsrin 80-ci illərinin axırlarında bütövlükdə respublikamızı bürüyən  xaos və qarşıdurma Bərdə  rayonundan  da yan  keçməmişdir. Məhz  həmin illərdə  iqtisadiyyatın  bütün  sahələrində  tənəzzül  baş verdi,  mədəni  sahə  tamamilə  yaddan  çıxdı.

İqtisadi,  sosial  və  mədəni sahələrdə  baş alıb  gedən  dağıntı  və  özbaşınalığa  yalnız  ulu öndər  Heydər  Əliyevin  xalqın  təkidli  tələbi ilə ikinci  dəfə  siyasi  hakimiyyətə  qayıdışından  sonra  son qoyuldu. Sonrakı  illərdə  və  hazırda  da  müxtəlif  sahələrdə davam edən  və dünyanı  heyrətə  salan  uğurlar  isə  hamımızın gözü qarşısındadır. Təkcə belə bir  faktı  xatırlatmaq  kifayətdir ki, ölkə  başçısı İlham Əliyevin fəal  dəstəyi,  UNESCO-nun və İSESCO-nun xoşməramlı səfiri, millət vəkili  Mehriban xanım Əliyevanın yüksək təşkilatçılığı  ilə həyata keçirilən  layihələr  nəticəsində  xalqımızın  mədəni  irsinin nadir inciləri  UNESCO-nun Dünya irsi siyahısına  daxil  edilməklə  bəşəri dəyər  və status almışdır. Lap bu  yaxınlarda  bütün dünyanın diqqəti,  haqlı olaraq, Bakıya,  Azərbaycanımıza  yönəlmişdi.  İlk Avropa Oyunları Bakıda keçirildi! Bu, təkcə böyük mənada idman  bayramı  deyildi. Bu həm də  müstəqil ölkəmizin  dünya səviyyəsindəki  hörmət və nüfuzu, iqtisadiyyatımızın,  sosial  həyatın, mədəniyyətimizin  böyük  təntənəsi  və qələbəsi  idi.

Bərdə Rayon  Mədəniyyət və Turizm Şöbəsi geniş və çoxcəhətli struktur şəbəkəsinə malikdir. Belə ki, hazırda   rayonumuzda  148  mədəniyyət  müəssisəsi  fəaliyyət göstərir. Mədəni-maarif ocaqlarında işləyənlərin  sayı isə 1365  nəfərdir. Deməli,  qarşıda duran  başlıca vəzifə bu geniş şəbəkənin  imkanlarından  maksimum səmərəli istifadə etməkdən, bu sahədə ardıcıl və sistemli iş qurmaqdan  ibarətdir. Təvazökarlıqdan uzaq olsa da, demək istəyirəm ki, son illər bu sahədə ardıcıl  və  məqsədyönlü  tədbirlər  işlənib  həyata keçirilmiş,  xüsusilə, mədəniyyət  müəssisələrinin  maddi-texniki  bazasının  möhkəmləndirilməsi,  onların  fəaliyyətinin  daha  da  canlandırılması, intizam  və tələbkarlığın  yüksəldilməsi sahəsində  bir sıra  ciddi  uğurlar əldə edilmişdir.

Ən  əvvəl, əlbəttə,  Heydər Əliyev  park-bulvarının  adını  çəkmək lazım gəlir. Bu il  mart ayının 12-də Prezident  İlham Əliyevin  açılışını  etdiyi  park-bulvar  Tərtər  çayının   hər iki sahili boyu  47  hektar  ərazini əhatə  edir.  Mübaliğəsiz  demək olar  ki,  bu geniş,  bənzərsiz  istirahət  məkanının misli-bərabəri yoxdur.  Eni 36, hündürlüyü 12 metrə  çatan  əsas  giriş  qapısı milli  memarlıq üslubunda  bəzədilib.  İki  istiqamətdən  çəkilən  asma körpülər, on iki  fəvvarənin  bir-birinə  bu  keçidlər  vasitəsilə   birləşdirilməsi parkın ecazkarlığını  daha  da artırır.

Bu istirahət mərkəzində  ulu öndər  Heydər Əliyevin  möhtəşəm  abidəsi  ucalır.  Ərazidə  10 hektar  sahəni  əhatə edən iki süni göl yaradılıb,  suya  qayıqlar salınıb.Velisoped  həvəskarları  üçün  ayrıca  yol, min  tamaşaçı  yeri olan süni örtüklü stadion, örtülü əl oyunları  meydançası, min yerlik  yay kinoteatrı, iki min kvadratmetr  ərazini əhatə edən  uşaq  əyləncə  mərkəzi, ana-uşaq  kafesi, ikimərtəbəli  çay  evi,  köşklər, ticarət və iaşə obyektləri və s. bura istirahətə gələnlərə  yüksək  səviyyəli  xidmət  təqdim  edir.

Vaxtilə  düz-əməlli bağı, parkı  olmayan  şəhərdə bu gün  neçə-neçə səfalı, hər cür şəraiti olan  istirahət məkanları  fəaliyyət göstərir:  Bayraq meydanı,  Zümürxan, Nüşabə, Səhəng bulağı,  Qəhrəmanlar parkı...

Təkcə  ötən il  ərzində rayonda 902  mədəni-kütləvi  tədbir  keçirilmiş, bu  şənliklərdə 82 mindən  çox  əhali  iştirak etmişdir.  Ümummilli  lider Heydər Əliyevin anadan olmasının 92-ci ildönümü  ilə  əlaqədar  silsilə  tədbirlər  xüsusilə  təntənəli xarakter  almış,  xalqımızın  və dövlətimizin  tarixindəki əlamətdar  günlər  mədəniyyət  müəssisələrində geniş  qeyd  edilmiş,  iştirakçılara  konsert  proqramları,  əbədi-bədii  kompozisiyalar,  biblioqrafik  icmallar,  kitab  və rəsm  sərgiləri  təqdim  edilmiş,   mütəfəkkirlərin  və  görkəmli  dövlət  xadimlərinin   təbliği  üçün  tədbirlər keçirilmişdir.

Bunlarla yanaşı,  narkomanlığa  qarşı  mübarizə,  sağlam  həyat  tərzinin  təmin  olunması, yeniyetmələrin  hüquqi  biliklərinin  artırılması, ailənin  qorunması  mövzularında  maarifləndirici  silsilə  tədbirlər  gerçəkləşdirilmişdir.

Rayon  sakinləri qarşısında  Xalq  teatrının,  Amerika Birləşmiş Ştatlarının  Qranpri  mükafatına  namizədliyi irəli  sürülmüş  məşhur “Meri Mak Brayd” estrada  qrupunun  çıxışları  təşkil edilmişdir.

Tarix-diyarşünaslıq muzeyində keçirilən 19  tədbirdə 11000  nəfər iştirak etmişdir.  Rəsm qalereyasında isə 16  tədbir-sərgi  keçirilmiş, ekspozisiyalara 6757 nəfər baxmışdır.

Bu gün insan  amili,  onun  mənəvi  dünyası, kamil vətəndaş kimi yetişməsi həmişəkindən daha vacib  və aktualdır. Respublikamızın  hər  bir  vətəndaşı normal  yaşadığı,  istədiyi  kimi, normal da istirahət etməli, mənən  zənginləşməli  və yüksəlməlidir. İstirahət dedikdə,  əlbəttə, təkcə bulaq başında,  çay  kənarında  keçən günlər nəzərdə tutulmur. Söhbət  daha çox  məsələnin  mənəvi tərəfindən - asudə  vaxtı burada  və necə keçirməkdən  gedir. Bu cəhətdən, sözsüz ki,  mədəniyyət evlərinin,  klub və  kitabxanaların rolu çox  böyükdür. O da həqiqətdir ki, son vaxtlar bir  sıra obyektiv  və  subyektiv  səbəblər üzündən  insanlar həmin  mədəniyyət  müəssisələrinə nadir hallarda  üz tuturdular. Biz,  ilk  növbədə,  bax bu  boşluğu  aradan  qaldırmağa  çalışdıq  və fərəhlə deyim ki,  buna nail olduq. Məsələn,  rayon  mədəniyyət  və turizm şöbəsinin apardığı  statistika göstərdi ki,  hazırda ötən ilin  eyni dövrü ilə müqayisədə kitabxanalara gələnlərin sayı təxminən 2 dəfə  artmışdır. Rayon  mərkəzi kitabxana  sistemində 985 tədbir  keçirilmiş, bu  tədbirlərdə  20  min  nəfər  iştirak etmişdir.

Turizmi inkişaf etdirmək  məqsədilə  mövcud 2 ölkə, 17 yerli  əhəmiyyətli tarixi  abidələrin ətrafında  abadlıq  işləri  aparılmış,  ad göstəriciləri yeniləşdirilmişdir, Seyid Yusif ağanın  məqbərə kompleksi tikilmişdir. Tarixi  abidələr  barədə  məlumatlar internet  portalında yerləşdirilmiş, Bərdə  şəhərinin  mərkəzi  küçələri  milli memarlıq  üslubunda yenidən qurulmuş,  rayonun  tarixinə  həsr edilmiş  elmi-praktik konfrans  və digər  tədbirlər  keçirilmişdir.   Hazırda  “Bərdə”  türbəsi  bərpa  edilir,  möhtəşəm mədəniyyət  mərkəzi tikilir. Onu  da  xüsusi olaraq  qeyd  etməyi  lazım bilirik ki, inşa  edilən  hər  bir obyektdə milli və  müasir memarlıq  elementlərindən  istifadə  diqqət mərkəzindədir.

2014-cü  ildə  rayonun  ümumtəhsil  müəssisələrinin 40 şagirdinin “Azərbaycanı tanıdaq”  devizi  altında  Şəki,  Qəbələ  və İsmayıllı  rayonlarında gəzintisi  təşkil  edilmişdir.

Hesabat  dövründə  rayonun mədəni-maarif  işçiləri,  musiqi  məktəblərinin  şagirdləri ölkə  miqyasında  keçirilən  müxtəlif  müsabiqələrdə  iştirak  etmiş  və bir sıra  uğurlar  qazanmışlar.  Məsələn, Mədəniyyət  və Turizm Nazirliyinin keçirdiyi III Respublika  müsabiqəsində Kənan Abdullayev, Sərxan Muxtarov, Ramilə Mirzəzadə, Səma Rzayev, Xəyal  Səmədov, Rövşən Dadaşov  və  başqaları diplom  və fəxri fərmanla təltif olunmuşlar.

Mən  burada fürsətdən istifadə  edərək Mədəniyyət  və Turizm  Nazirliyinin, Bərdə Rayon İcra  Hakimiyyətinin  rəhbərliyinə kollektivimizin səmimi  təşəkkür  və minnətdarlığını çatdırmaq istəyirəm.  İşin  daha yaxşı  təşkili,  mədəniyyət  müəssisələrinin  maddi-texniki  bazasının  möhkəmləndirilməsi  və s.  məsələlərlə bağlı nə vaxt  müraciət  etmişiksə,  dərhal  öz  müsbət  həllini  tapıb.  Bu  isə,  sözsüz ki,  bizim  məsuliyyətimizi artırmaqla  yanaşı,  daha  yaxşı  işləməyə, səy və  bacarığımızı  artırmağa səsləyir.

Yuxarıda  da  qeyd  etdiyimiz kimi, 3 min il tarixi olan  qədim Bərdə  bu gün  regionun  mədəni  mərkəzinə  çevrilib. Başqa  sözlə desək, itirilmiş  şöhrət geri qayıdır. Şəhər  və  kəndlərimiz öz  simasını  əsaslı  şəkildə  dəyişib. Bu gün Bərdə dünyanın  ən gözəl şəhərlərindən  birinə  çevrilib. Tikinti-quruculuq  işləri gündən-günə yeni  vüsət alır.  İqtisadi  və  sosial sahədə  əsaslı  və ardıcıl uğurlar  qazanılıb, ümumi  məhsul  istehsalı artıb, insanlarımızın gəliri, gün-güzəranı  daha da yaxşılaşıb. Rayonumuzun  mədəniyyət və turizm kollektivləri bu prosesdə  fəal  iştirak  etməklə milli-mənəvi dəyərlərimizi, tarixi  abidələrimizi  qorumaq, inkişaf etdirmək, daha  da  zənginləşdirmək  kimi  nəcib və xeyirxah  işə öz töhfələrini  bundan sonra da artıracaqlar.

İlyas HACIYEV,
Bərdə Rayon Mədəniyyət  və
Turizm Şöbəsinin müdiri