Müdafiə Nazirliyinin və Azərbaycan Dövlət İqtisad Universitetinin (UNEC) birgə təşkilatçılığı ilə universitetin professor-müəllim heyəti və bir qrup tələbəsi ön cəbhədə olublar. Öncə ulu öndər Heydər Əliyevin Ağstafa rayonunda ucaldılan abidəsi ziyarət olunub.

Sonra onlar Azərbaycan Respublikasının Milli Qəhrəmanı, şəhid Rafiq Alıcanovun 50 illik yubileyində iştirak ediblər. Milli Qəhrəmanın abidəsi və Köçvəlli kəndindəki məzarı ziyarət olunub.

UNEC-in rektoru, professor Ədalət Muradov Azərbaycan Respublikasının Prezidenti, Ali Baş Komandan İlham Əliyevin ölkədə ordu quruculuğuna və hərbçilərə göstərdiyi qayğıdan danışıb. Ordu ilə xalqın, dövlətlə hərbçilərin sıx əlaqələrindən söz açıb.

UNEC-in kafedra müdiri, professor, millət vəkili Xanhüseyn Kazımlı Milli Qəhrəman Rafiq Alıcanovun həyatından, erməni işğalçılarına qarşı mübarizədə göstərdiyi qəhrəmanlığından danışıb. Bildirib ki, Milli Qəhrəmanın qızı UNEC-in məzunudur, oğlu isə III kursda təhsil alır.

Sonra tədbir iştirakçıları Ağstafa, Qazax, Tovuz, Şəmkir, Goranboy və Gədəbəy rayonlarına səfər edərək, ön cəbhədə əsgər və zabit heyəti ilə görüşüb, onlara hədiyyələr təqdim ediblər. Düşmənlə 80 metr məsafədə yerləşən səngərlərdə əsgərlərlə söhbət edib, həyat şəraiti, məişəti ilə yaxından tanış olublar. Əsgərlərin döyüş ruhundan, onlar üçün yaradılan şəraitdən razı qalıblar. Bir daha əmin olublar ki, Azərbaycan Ordusu torpaqlarımızı işğaldan azad etmək iqtidarındadır. Döyüşçülərimizin qələbə əzmi yüksəkdir.

Görüşdə millət vəkili Xanhüseyn Kazımlıya “Veteran həmrəyliyi” medalı təqdim olunub.

Elnarə ÖMƏROVA