Gəncə Şəhər Səhiyyə İdarəsi 1 İyun – Uşaqları Beynəlxalq Müdafiə Günü münasibəti ilə 1 saylı körpələr evində bayram şənliyi təşkil edib. Bu barədə məlumatı idarənin mətbuat xidməti yayıb. Bura 19 körpəni bayram münasibətilə təbrik etmək üçün səhiyyə idarəsinin rəisi, professor Əlikram Məmmədov, tibb ocaqlarının baş həkimləri, şəhərin baş pediatrı və digər qonaqlar gəliblər.

Tədbirdə balaca fidanlara hədiyyələr, oyuncaqlar təqdim olunduqdan sonra onlarla musiqi sədaları altında qol qaldırıb rəqs edən professor Ə.Məmmədov bu körpələrə göstərilən diqqət və qayğıdan danışıb:

– Biz mütəmadi olaraq bu fidan balaları ziyarət edirik. Onların qayğısına qalır, həm sağlamlıqları ilə maraqlanır, həm də qarşılaşdıqları çətinlikləri aradan qaldırmağa çalışırıq. Bildiyiniz kimi, dövlətimiz, başda Prezidentimiz cənab İlham Əliyev olmaqla daim körpələrə diqqət və qayğı göstərir, onların sağlam və firavan böyümələri üçün bütün lazımi tədbirləri həyata keçirir. Bu gün körpələr evində yaradılan yüksək şərait bunun bariz nümunəsidir. Biz də öz növbəmizdə bu balaca fidanlara bacardığımız köməkliyi və yardımı etməklə, bir az da olsa, onlara valideyn qayğısını və istiliyini verməyə çalışdıq”.

Tədbirin sonunda xatirə şəkilləri çəkilib.

 H. QASIMOV,
“Xalq qəzeti” nin bölgə müxbiri