Azərbaycanın elm və təhsil  ictimaiyyətinə ağır itki üz vermişdir. Tanınmış psixoloq alim, psixologiya elmləri doktoru, professor, Əməkdar elm xadimi, Prezident  təqaüdçüsü Əbdül Əli oğlu Əlizadə fevralın 22-də ömrünün 83-cü ilində uzun sürən ağır xəstəlikdən sonra vəfat etmişdir.

Ə.Əlizadə 1932-ci il avqustun 16-da Bakı şəhərində anadan  olmuşdur. 1950-ci ildə Bakı şəhərindəki 31 nömrəli orta məktəbi bitirdikdən sonra Azərbaycan Dövlət Universitetinin (indiki BDU) filologiya fakültəsinin  məntiq-psixologiya şöbəsinə daxil olmuşdur. 1955-ci ildə ADU-nu fərqlənmə diplomu ilə başa vuran Ə.Əlizadə Əzim Əzimzadə  adına Azərbaycan Dövlət Rəssamlıq məktəbində  psixologiya və pedaqogika müəllimi kimi əmək fəaliyyətinə başlamışdır. 1959-cu ildə Azərbaycan Dövlət Pedaqoji İnstitutunda psixologiya üzrə aspiranturaya daxil olan Ə.Əlizadə 1962-ci ildə “Şagirdlərin təxəyyül fəaliyyətində analiz-sintez proseslərinin  xüsusiyyətləri” mövzusunda namizədlik, 1975-ci ildə  “Cinsi dimorfizm və şəxsi qarşılıqlı münasibətlərin formalaşmasının  psixoloji  xüsusiyyətləri” mövzusunda   doktorluq dissertasiyası müdafiə etmişdir. Bu dissertasiya işi psixologiya elmində cinsi fərqlərin  psixologiyası və cinsi tərbiyə konsepsiyasının formalaşmasında önəmli rol oynamışdır. Ə.Əlizadə bu əsərə görə SSRİ-də cinsi tərbiyə  və cinsi fərqlərin  psixologiyası sahəsində tanınmış alimlərdən biri kimi söz sahibinə çevrilmişdir.

1975-2013-cü illər ərzində  38 il  fasiləsiz olaraq ADPİ-də (indiki ADPU) ümumi psixologiya kafedrasının  müdiri vəzifəsində çalışan alim pedaqogika və psixologiya üzrə yüksəkixtisaslı  kadrların hazırlanmasında səmərəli fəaliyyət göstərmişdir. Onun elmi rəhbərliyi ilə bir  nəfər  elmlər doktoru, 50 nəfər psixologiya  üzrə fəlsəfə doktoru elmi dərəcəsi almışdır. Alimin ölkəmizdə və onun  hüdudlarından kənarda psixologiyanın  aktual  problemlərinə həsr olunmuş  müxtəlif elmi simpozium və konfranslardakı  çıxışları mütəxəssislər tərəfindən yüksək qiymətləndirilmişdir.

Psixologiya  üzrə dərsliklərin  hazırlanmasında yaxından  iştirak  edən Ə.Əlizadənin Azərbaycan Respublikasının təhsil  sistemində islahatların hazırlanması və həyata keçirilməsində xidmətləri  əvəzsizdir. Onun hazırladığı  təlim məqsədlərinin taksonomiyası tədris  prosesini elmi-metodik  səviyyədə planlaşdırmaq  və  nəticəni ölçmək imkanı verir.

İstedadlı uşaqlarla bağlı apardığı  tədqiqatlar əsasında hazırladığı “İstedadlı uşaqlar. Psixopedaqoji məsələlər” (Bakı, 2005)  monoqrafiyası psixologiya və pedaqogika elminə dəyərli töhfədir. Ə.Əlizadə pedaqogika və psixologiyanın müxtəlif sahələrinə həsr olunmuş 70 monoqrafiya, dərslik və dərs vəsaitinin, 500-dən artıq elmi məqalənin müəllifidir.

Onun elmi fəaliyyəti dövlətimiz tərəfindən layiqincə qiymətləndirilmişdir. O, bir sıra orden və medallarla, o cümlədən “Şöhrət” ordeni ilə təltif olunmuş, “Əməkdar elm xadimi” fəxri adına layiq görülmüşdür.

Ə.Əlizadə yüksək əxlaqı, səmimiyyəti, təvəzökarlığı və digər insani keyfiyyətləri ilə həmişə örnək olmuşdur. Görkəmli alim, psixoloq, bacarıqlı təhsil işçisi, xeyirxah insan Əbdül Əlizadənin xatirəsi onu tanıyanların qəlbində həmişə yaşayacaqdır.

Allah rəhmət eləsin!

Azərbaycan Respublikasının Təhsil Nazirliyi
Azərbaycan Dövlət Pedaqoji Universiteti